Það er komið að því!

Skráð af

-

July 22, 2022

Screenshot 2022-07-22 at 15.21.55 — Verðlaunatillaga um nýtt hjúkrunarheimili á Höfn.

Í gær fimmtudaginn 21. júlí samþykkti bæjarráð fyrir hönd sveitarfélagsins tilboð í framkvæmdir við byggingu nýs hjúkrunarheimilis og í dag fengum við fréttir af því að ríkið hefur samþykkt fjármagn í framkvæmdina fyrir sitt leiti!

Ferlið að þessum tímamótum hefur verið langt og strangt og ber nú loks árangur. Skrifað verður undir samning við verktakann Húsheild ehf í ágúst, undirbúningur hefst vonandi sem fyrst og framkvæmdir í kjölfarið.

Fleiri jákvæðar fréttir bárust í vikunni en Vegagerðin hefur skrifað undir samning við Ístak ehf um framkvæmdir við nýjan veg um Hornafjarðarfljót svo þar ættu framkvæmdir einnig að fara af stað von bráðar.

Báðar þessar framkvæmdir hafa verið í umræðunni í áratugi og nokkrar bæjar- og ríkisstjórnir komið að málunum með einum eða öðrum hætti.

Til hamingju hornfirðingar!

Ásgerður K. Gylfadóttir, oddviti Framsóknar í bæjarstórn Sveitarfélagsins Hornafjarðar og aðalmaður í bæjarráði.

Íbúakosningar og kjörstaðir

Skráð af

ritstjorn

-

July 12, 2022

Enn er flækjufótur á ferð vegna fyrirhugðara íbúakosninga um þéttingu byggðar í innbæ á Höfn. Eins og íbúar muna þá þurfti að hætta við íbúakosninguna samhliða sveitarstjórnarkosningum 14. maí sl. vegna formgalla á spurningunni sem lögð var fram. Fyrirhugað var að hafa kosningu í lok ágúst nk. en nú hefur innviðaráðuneytið leiðbeint sveitarfélaginu með að fresta kosningunni um óákveðinn tíma eða þar til ný reglugerð um um framkvæmd íbúakosninga liggur fyrir í haust.

Það er bagalegt að þurfa að fresta kosningunni aftur því nauðsynlegt er að fá botn í þetta mál en á meðan er bæði aðalskipulag og deiliskipulag um þéttingu byggðar í innbæ í gildi þó lóðirnar sem bættust við með samþykkt þeirra hafi ekki verið auglýstar lausar til umsóknar vegna kröfunnar um íbúakosningu.

Ég hvet fólk til að kynna sér skipulagið en kynningarefni má finna á heimasíðu sveitarfélagsins https://www.hornafjordur.is/stjornsysla/skipulagsmal/kynning-a-skipulagi-innbae-v.-ibuakosningar/

Kjörstaðir í sveitarfélaginu.

Á bæjarráðsfundi 7. júlí sl. mættu tveir fulltrúar úr yfirkjörstjórn sveitarfélagisns og fóru yfir greinagerð yfirkjörstjórnar um kosningarnar 14. maí sl. Þær kosningar voru fyrstu kosningarnar sem framkvæmdar voru eftir gildistöku nýrra kosningalaga og reyndi þá fyrst á breyttar hæfisreglur starfsmanna í kosningunum og ýmislegt fleira.

Það reyndist vandasamt að manna kjörstaði í sveitarfélaginu þar sem nokkuð margir sem áður höfðu starfað við kosningar í sveitarfélaginu reyndust vanhæfir vegna tengsla við frambjóðendur. Það tókst að lokum og voru fimm kjörstaðir í sveitarfélaginu.

Í aðdraganda kosninganna kom upp sú umræða hvort tímabært væri að huga að fækkun kjörstaða, þeirri umræðu var vísað til nýrrar bæjarstjórnar þar sem ekki þótti rétt að gera þær breytingar án samtals við íbúa í sveitarfélaginu.

Sveitarfélagið er ein kjördeild og hefur því val um hversu margir kjörstaðirnir eru innan marka þess. Yfirkjörstjórn lagði það til á fundi bæjarráðs að kjörstöðum yrði fækkað í einn og hann yrði á Höfn. Verði sú breyting niðurstaðan, þá mun utanumhald verða auðveldara, mönnun einfaldari og dregið úr kostnaði.

Það væri áhugavert að heyra hvað íbúum finnst um þá tillögu og ef þeim hugnast hún ekki hvað þeir leggja til að margir kjörstaðir verði í sveitarfélaginu?

Hlakka til að heyra frá ykkur – njótið sumarsins!

Ásgerður K. Gylfadóttir, aðalmaður í bæjarráði.

Tímamót!

Annað

Skráð af

ritstjorn

-

May 28, 2022

Í dag lýkur kjörtímabili sitjandi bæjarstjórnar og nýtt tekur við á morgun sunnudaginn 29. maí.

Líðandi kjörtímabil hefur verið ansi fjölbreytt, bæði skemmtilegt og boðið uppá krefjandi áskoranir sem engann hafði órað fyrir s.s. heimsfaraldur!

Kærar þakkir

Ég vil fyrir hönd aðal- og varabæjarfulltrúa Framsóknar og stuðningsmanna síðustu fjögur ár, þakka íbúum sveitarfélagisns og þá sérstaklega starfsfólki þess fyrir gott og ánægjulegt samstarf.

Saman höfum við staðið okkur vel í þeim áskorunum og verkefnum sem legið hafa fyrir, þó alltaf megi rýna til gagns og gera betur, ekki síst þegar litið er til baka og heildarmyndin liggur fyrir.

Matthildi Ásmundardóttur bæjarstjóra vil ég þakka sérstaklega fyrir gott samstarf á kjörtímabilinu og óska henni velfarnaðar í nýjum verkefnum.

Áfram veginn

Í afstöðnum kosningum náðum við framsóknarfólk ekki markmiðum okkar, niðustaðan varð tveir bæjarfulltrúar. Það voru óneitanlega vonbrigði en ekki dugar að dvelja við það. Bæjarfulltrúar Framsóknar munu hér eftir sem hingað til vinna að því að efla samfélagið okkar hvort sem er í meiri- eða minnihluta og vinna góðum málum brautargengi í samvinnu við aðra bæjarfulltrúa og samfélagið í heild.

Áfram munum við nýta þennan góða vettvang, leidarhofdi.is til að greina frá störfum í bæjarstjórn og sem upplýsingamiðil framboðsins.

Takk fyrir samfylgdina á kjörtímabilinu sem er að ljúka, hlakka til framhaldsins á því sem tekur við.

Ásgerður K. Gylfadóttir, oddviti Framsóknar og stuðningsmanna.

Virkar samgöngur og skipulag

Umhverfis- og skipulagsmál

Skráð af

ritstjorn

-

May 13, 2022

Þrátt fyrir að vera uppalinn hér í Hornafirði dvaldi ég hluta af mótunarárum mínum við nám í Reykjavík og erlendis. Ég flutti aftur heim árið 2010. Þegar við Eva ákváðum að kaupa fasteign á Hornafirði var ég með mjög einfalda kröfu, ég vildi búa í útbænum. Ég var ákveðinn í því að ég vildi að börnin mín myndu ganga og/eða hjóla í skóla og tómstundir og það sama myndi gilda um mig.

Fyrsta eignin okkar var á Júllatúni þar sem við nutum útsýnis á heimsmælikvarða en þegar í ljós kom að þriðja barnið væri á leiðinni ákváðum við að stækka við okkur og fluttum í Hagatúnið. Fjarlægðir þar eru litlar. Það tekur börnin okkar styttri tíma að hlaupa heim úr skólanum en að vera sótt. Það má reyndar skjóta því inn að börn á Hornafirði eru ótrúlega dugleg að hjóla og ganga. Þegar ég fylgi börnum mínum í skóla á morgnana hjólandi fylgir hópur hjólandi og gangandi barna. Foreldrarnir eru stutt á eftir, akandi.

Ég nýti virka ferðamáta mjög mikið hvert sem ég fer. Á þessu eru auðvitað undantekningar. Veður spilar stundum inn í, oft þarf að græja eitthvað eftir vinnu eða það algengasta, leti.

Að nota virka ferðamáta hefur ekki bara jákvæð áhrif á líkamlega heilsu heldur líka andlega. Þá verður til miklu skemmtilegra samfélag þar sem fólk mætist gangandi eða hjólandi en ekki á 2 tonna díselvélum. Fyrir utan það augljósa sem þarf vart að taka fram, jákvæð áhrif á umhverfið.

En það er ekki sjálfgefið að fólk gangi eða hjóli. Þetta er skipulagsmál. Forgangur hjólandi og gangandi þarf að vera skýr og hjólaleiðir vel merktar. Ný hverfi verða að vera hugsuð með þetta að leiðarljósi og því er mikilvægt að byggja samfellda byggð með góðar göngu- og hjólaleiðir. Ef ný hverfi eru byggð, aðskilin frá annarri byggð, eru ansi miklar líkur á því að einn ferðamáti verði allsráðandi. 2 tonna díselvélar.

Bjarni Ólafur Stefánsson, vinnslustjóri, 8. sæti á lista Framsóknar og stuðningsmanna.

Kosningar 14. maí!

Annað

Skráð af

ritstjorn

-

May 12, 2022

Nú þegar örstutt er í kjördag hamast frambjóðendur við að koma sínum stefnumálum að, reyna að hafa áhrif á kjósendur, sumir lofa meira heldur en þeir geta staðið við með góðu móti hvort sem það er of íþyngjandi fyrir sveitarsjóð eða jafnvel ekki einu sinn á könnu sveitarstjórnar. Allt á að gera stórt og smátt. Því miður eiga þeir ágætu frambjóðendur sem svo digurbarkalega tala eftir að komast að því, ef þeir fá brautargengi, að það er ekki hægt að gera allt en vissulega er hægt að gera margt þar sem skuldastaða Sveitafélagsins Hornafjarðar er góð og mörg sveitarfélög öfunda okkur af því.

Tekjur og gjöld

Eitt að því fyrsta sem manni var kennt í bókfærslu eru þessir dálkar og að menn skyldu bera virðingu fyrir þeim báðum. Þeir gegna báðir mikilvægu hlutverki í að halda utan um rekstur, hvort sem hann er stór eða smár. Sveitafélag hefur ekki mikla tekjumöguleika aðra en að auka álögur á íbúana og fyrirtækin. Sveitarfélag selur ekki vörur eða þjónustu sem getur skilað afgangi, útsvar og fasteignarskattur eru u.þ.b. 2/3 af tekjum og jöfnunarsjóður u.þ.b. 1/3. Á því kjörtímabili sem nú er að líða var bæði lækkaður fasteignaskattur á heimili og fyrirtæki, hvað svo sem menn gera á því næsta verður sveitarfélagið að vera samaburðarhæft við önnur sveitarfélög án þess þó að skaða reksturinn svo lántaka verður að vera hófleg. Það mun þurfa að taka lán og sveitarfélagið ræður við það, en of mikil skuldsetning er blóðug og hvet ég alla nýja bæjarfulltrúa að falla ekki í þá gryfju.

Útgjöldin

Þessi skemmtilegi liður er vandmeðfarinn og held ég að sú bæjarstjórn sem senn kveður hafi verið nokkuð farsæl hvað útgjöld varðar, við reyndum að lesa í atvinnuástandið eins og við framast gátum. Ekki að setja of mikið af framkvæmdum af stað á sama tíma, reyna þó alltaf að vera með eitthvað í gangi því okkur fannst við skulda orðið innviða uppbyggingu, en vissulega er framkvæmdaáætlunin gerð að hausti fyrir næsta ár. Við reyndum að huga að nýjum verkefnum samhliða því sem viðhaldi var sinnt, einnig ákváðum við að fráveitu og götum yrðum við að sinna áfram og frekar að bæta í heldur en hitt. Vissuleg hefðum við geta gert betur, maður getur alltaf gert betur og allir hafa skoðun á því í hvað það á að verja fjármununum í.

Lokaorð

Undanfarin ár hefur launakostnaður sveitafélagsins aukist um rúmar 200 milljónir, annars vegar eru það kjarasamningar, launahækkanir þeim tengdar og stytting vinnuvikunnar og hins vegar hefur stöðugildum fjölgað, bæði til að auka þjónustu og svo líka vegna covid pestarinnar. Í þessu sambandi er vert að geta þess að launakostnaður hjá sveitarfélögum hefur að meðaltali aukist um 16%, 9% hjá ríki og 7% í einkageiranum . Við erum ekkert eyland í þessu, en þetta er áskorun sem bíður nýrrar bæjarstjórnar. Tekjur eru að aukast með auknum ferðamannastraum, það eru bara spennandi tímar framundan. Við þurfum öfluga bæjarstjórn með skýra sýn og kunnáttu til að takast á við þau fjölmörgu verkefni sem bíða.

Setjum X við B á laugardaginn!

Ásgrímur Ingólfsson, skipstjóri og forseti bæjarstjórnar. 14. sæti á lista Framsóknar og stuðningsmanna.

Við og samfélagið okkar.

Skráð af

ritstjorn

-

May 11, 2022

Jæja gott fólk, senn líður að kosningum og flestir búnir eða alveg að verða búnir að gera upp hug sinn hvar setja skuli xið þann 14 maí næstkomandi. Vikan fyrir kosningar er alltaf spennandi og heilabúið í yfirvinnu við að melta það sem hefur verið farið yfir og sagt síðustu vikur.

Ég er nú meira fyrir að taka samtalið en skrifa svona pistil og kveinkaði mér aðeins þegar ég var beðinn um nokkur orð á blað. En fór að velta fyrir mér samtölum mínum við íbúa sveitarfélagsins í þessu brölti mínu. Þau hafa verið virkilega áhugaverð og skemmtileg, hvort sem viðkomandi er með kosningarétt eður ei sem þeir voru ekki allir.

Það sem situr eftir er að það er mikilvægt að við temjum okkur kurteisi og samvinnu, óháð stöðu eða hag. Það að hlusta með opnum hug og bera virðingu fyrir skoðunum annarra.

Ég t.d ræddi við einstakling sem var algerleg óður út í vissa framkvæmd og ég ætlaði mér ekkert að reyna breyta þeirri skoðun hans enda alger óþarfi, ég hlustaði á hans sjónarhorn og hugmyndir varðandi verkefnið og eftir nokkuð langt samtal tókumst við í hendur og við kvöddumst með bros á vör með sitthvora skoðunina á málinu.

Flest höfum við skoðanir á málum eða máli er snúa að sveitarfélaginu okkar og er engin hugmynd eða skoðun verri en hver önnur. Það er gott að koma öllum hugmyndum á framfæri og ræða þær, því í skrítnum og kannski ógerlegum hugmyndum leynist kannski ein, hugsanlega tvær góðar sem bætt gæti samfélagið okkar fyrir komandi kynslóðir.

Í þessum kosningum er mikil endurnýjun á listum og sem einn af þeim nýju veit ég að það verður margt að læra til að geta sinnt vel þeim verkefnum sem okkur verða falin. Mikill mannauður og þekking er í fólkinu sem hefur mótað samfélagið okkar til dagsins í dag með þrotlausri vinnu og dugnaði, verum ekki feimin við að leita til þeirra eftir ráðleggingum, það er alger óþarfi að eyða tíma í að finna upp hjólið.

Höfum “ÖLL” að leiðarljósi að vinna saman að því að gera samfélagið okkar að því besta á Íslandi. Styðjum og stöndun með hvort öðru, sérstaklega þegar við sjáum að einhverjum líður illa eða þarf aðstoð, minnum hvort annað reglulega á að lífið er núna og framtíðin er björt í Sveitarfélaginu Hornafirði.

Lars J. Andrésson Imsland, framkvæmdastjóri, East Coast Travel ehf, 11. sæti á lista Framsóknar og stuðningsmanna

Study and field trips free of charge for elementary students.

Skráð af

ritstjorn

-

May 8, 2022

It is pretty obvious that we live in the most beautiful county of the country next to Vatnajökull national park. The beauty of the nature surrounds us and is only step away to enjoy.

Students at the elementary school get to explore the beauty because the school has study and field trips for every class to a different place in the county and the trips become more extensive with age.

I have always like how the elementary school introduces our beautiful nature and landscape to students and intergrades it into their study. Whether it is picking berries, hiking, daytrip to Ingólfshöfði or Lönsöræfi. They will make good memories, it is a good outdoor activity and the children will learn to respect nature and the environment.

One of the main goals in the municipality´s enviromental and climate policy is enviromental education. The ways to that goal is that the children know their enviroment and education about it. And where is a better place for that than in nature ?

In previous terms Framsókn has submitted proposals that were approved and have to do with children´s welfare and best interest. It was increasing funding for leisure grant, free into the swimming pool to age 18 and fruit snacks free of charge at the elementary school.

Now we like to take another step this coming term and work towards that study and field trips will be free of charge. But students pay for food and accomodation in these trips. We know that hobbies are good prevention but also a good walk out in nature with your classmates.

Guðrún Sigfinnsdóttir, receptionist 9th place on the list of Framsókn and their supporters.

Samvinna er málið!

Skráð af

ritstjorn

-

May 8, 2022

Eins og langflestir eru meðvitaðir um verður kosið til sveitastjórna þann 14. maí n.k. Ég skipa tólfta sæti á lista Framsóknar og stuðningasmanna þeirra, vegna þess að ég hef alltaf haft áhuga á samfélaginu mínu og hvað þar fer fram. Hef áður tekið þátt í kosningum og sat þá sem varamaður í bæjarstjórn og um skeið í skólanefnd. Hér í Hornafirði er gott samfélag en alltaf er hægt að gera betur og mig langar til að taka þátt í því.

Fyrir þá sem ekki þekkja mig þá heiti á Aðalheiður Fanney Björnsdóttir og starfa sem leikskólasérkennari á leikskólanum Sjónarhóli á Höfn, en ég hef starfað í leikskóla hér í sveitarfélaginu í yfir tuttugu ár. Ég er gift Valdmar Ingólfssyni bónda og við eigum fjögur börn á aldrinum 12-22 ára. Ég hef unnið ýmis störf í gegnum tíðina, verið viðloðandi búskapinn í yfir tuttugu ár, við ferðaþjónustu, unnið töluvert bæði síld og saltfiski, á pósthúsinu, í verslunum og ýmsu fleiru þannig að ég á aðeins í reynslubankanum hvað það varðar.

Ég vil sjá góða samvinnu varðandi málefni sveitarfélagsins, að þau framboð sem eiga fulltrúa í bæjarstjórn og nefndum bæjarins beri gæfu til þess að leggjast á eitt í því að forgangsraða þeim verkefnum sem þarf að vinna og gera áætlun um það til lengri tíma. Það er eitt sem við öll eigum sameiginlegt, við viljum gera gott samfélag betra og berum hag íbúa sveitarfélagsins í heild fyrir brjósti. Til þess að gera þetta verðum við að hlusta á íbúa sveitarfélagsins, leyfa þeim að fylgjast með hvað er að gerast og nýta okkur lýðræðisleg réttindi eins og íbúakosningar þegar það á við.

Ég vil áframhaldandi uppbyggingu íþróttamannvirkja, að fyrst verði byggð líkamsrækt við sundlaugina og í framhaldinu nýtt og fullkomið íþróttahús. En það sem er ekki síður mikilvægt er að halda áfram að vinna að viðhaldi eldri fasteigna sveitarfélagsins.

Mitt hjartans mál eru börn og unglingar – og það sem snýr að þeim. Það þarf að sjálfsögðu að sjá til þess að öll börn búsett í sveitarfélaginu komist inn í leikskóla við eins árs aldur og fái þar þá umhyggju og örvun sem öllum börnum er nauðsynleg. Það sama á við um grunnskólann, þar eiga öll börn að fá kennslu og umhyggju sem þarf til að þeim líði vel.

Aðalheiður Fanney Björnsdóttir leikskólakennari, í 12. sæti á lista Framsóknar og stuðningsmanna.

Gjaldfrjálsar náms- og vettvangsferðir grunnskólabarna

Menntun og íþróttir

Skráð af

ritstjorn

-

May 6, 2022

Það er nokkuð augljóst að við búum í fallegustu sýslu landsins með sjálfan Vatnajökulsþjóðgarð í næsta nágrenni. Náttúrufegurðin umlykur okkur og stutt að fara til að njóta.

Nemendur Grunnskóla Hornafjarðar fá svo sannarlega að upplifa þetta enda farið í náms- og vettvangsferðir með hvern árgang á mismunandi slóðir og verða ferðirnar umfangsmeiri eftir því sem nemendur verða eldri.

Ég hef alltaf verið hrifin af því hjá grunnskólanum hvað hann nýtir náttúruperlur svæðisins vel til að kynna fyrir krökkunum og flétta það inn í námsefnið. Hvort sem það er að fara í berjamó, fjallgöngur, dagsferð út í Ingólfshöfða eða í Lónsöræfi. Þarna skapast minningar, þetta er góð útivera og börnin læra að bera virðingu fyrir náttúrunni og umhverfinu.

Eitt af meginmarkmiðum í umhverfis- og loftslagsstefnu sveitarfélagsins er einmitt umhverfisfræðsla. Leiðir að því markmiði eru einmitt að börnin þekki umhverfi sitt og fræðsla. Hvar er betra að fræðsla um umhverfis- og loftslagsmál fari fram en úti í náttúrunni?.

Á fyrri kjörtímabilum hefur Framsókn lagt fram tillögur sem voru samþykktar sem snúa að velferð og hagsmunum barna í sveitarfélaginu þegar kemur að hækkun tómstundastyrks, frítt í sund fyrir börn að 18 ára aldri og að fella niður gjaldtöku á ávaxtabita í grunnskólanum.

Nú viljum við ganga lengra og vinna að því að náms- og vettvangsferðir nemenda verði gjaldfrjálsar. En nemendur greiða nú uppihald í þessum ferðum sem er skilgreint sem fæði og gisting. Við vitum að tómstundir eru góð forvörn en það er líka góð ganga úti í náttúrunni með bekkjarfélaögunum.

Guðrún Sigfinnsdóttir, mótttökuritari, 9. sæti á lista Framsóknar og stuðningsmanna.

Sindravellir

Menntun og íþróttir

Skráð af

ritstjorn

-

May 4, 2022

Sumarið er í nánd og eins og flestir ættu að hafa orðið varir við þá er lífið á íþróttavellinum hafið. En það eru kannski færri sem vita að keppnistímabilið í knattspyrnu hófst fyrir mörgum mánuðum síðan. Meistaraflokkarnir okkar byrjuðu að keppa í desember, 3.flokkarnir kepptu sína fyrstu leiki í mars og á næsta ári þá munu 4.flokkarnir einnig byrja svona snemma. Þetta er vegna þess að núna keppa öll lið eina umferð hvert við annað og svo er deildunum skipt upp og þá er keppt við jafningja í seinni umferð sem gerir þetta allt mun skemmtilegra auk þess sem allir fá fleiri leiki.

Aðstaðan

Því miður þá býður aðstaðan okkar ekki upp á að við getum spilað leiki hér heima svona snemma þar sem vellirnir okkar eru grasvellir og það segir sig sjálft að þó að við höfum venjulega milda vetur þá eru vellirnir okkar ekki tilbúnir svona snemma og það er ekki hægt að æfa á því eins mikið og þarf þar sem grasið þolir ekki svona mikla notkun, ekki heldur yfir sumartímann. Nú í mars þá spiluðu 3.flokkarnir okkar tvo “heimaleiki” í Garðabæ með tilheyrandi kostnaði fyrir bæði knattspyrnudeildina sem og foreldra og það sjá jú allir að það er alveg galið að þurfa að keyra tæplega 500 km í og úr heimaleik og þurfa einnig að gista, því ekki er hægt að leggja það á börn að keyra þetta allt á einum og sama deginum auk þess að keppa. Fjarðabyggðahöllin er nær okkur en hún er þéttsetin og ekki unnt að komast að þar þegar okkur hentar og það kallar líka á löng ferðalög að keppa þar. Báran hefur hjálpað okkur heilmikið æfingalega séð en því miður þá er völlurinn í henni ekki nægilega stór til þess að unnt sé að keppa á honum. Allar æfingar á veturna fara fram þar og eins hafa grunnskólabörnin notað Báruna í frímínútum og það má segja að það sé verið að æfa og leika sér í Bárunni alla daga og fram á kvöld og er það vel.

Öflug deild

Hjá knattspyrnudeild Sindra eru 140 iðkendur í öllum flokkum bæði kvenna og karla frá 7.flokk til og með 3.flokk og svo höldum við úti bæði meistaraflokki karla og kvenna og í sumar verður einnig karlalið í meistaraflokki sem keppir undir merkjum umf Mána.

Völlurinn

Íþróttahúsið okkar er barn síns tíma og löngu kominn tími á nýtt. Staðsetning nýs húss er hugsuð á æfingasvæðinu við hliðina á íþróttavellinum. Þegar farið verður að hanna og teikna húsið þá verðum við að huga að annarri uppbyggingu á svæðinu samhliða því. Þegar byrjað verður að byggja íþróttahús þá missum við æfingasvæðið og ekki er unnt að æfa á aðalvellinum því grasið þar þolir ekki endalausan ágang og í raun er staðan þannig að það er kominn tími til að skipta því út þar sem líftíma þess er lokið. Ef við viljum að börnin okkar nái árangri í knattspyrnu og haldi, getulega séð í við jafnaldra sína annarsstaðar á landinu, þá tel ég að eina lausnin fyrir okkur sé að leggja gervigras á Sindravelli. Það er að vísu kosnaðarsamt en það er líka dýrt að skipta út grasinu. Á móti kemur að vallarumhirða á gervigrasi er umtalsvert minni en á grasi. Grasvelli þarf að merkja/mála fyrir hvern leik, það þarf að slá og hreinsa eftir slátt, gata völlinn og svo mætti lengi telja. Gervigras á Sindravöllum myndi gerbreyta allri æfingaaðstöðu yfir vetrartímann og sé ég fyrir mér að unnt yrði að æfa á vellinum nánast á hverjum degi allan ársins hring, sem myndi létta álagið á Bárunni, auk þess sem völlurinn myndi nýtast t.d. skólabörnunum á skólatíma sem og öðrum sem hafa gaman af hreifingu.

Arna Ósk Harðardóttir formaður knattspyrnudeildar Sindra, 10.sæti Framsóknar og stuðningsmanna