Við göngum til kosninga laugardaginn 16. maí. Við sem stöndum að framboði Framsóknar og stuðningsmanna bjóðum fram skýran valkost, skýra málefnaskrá og valkost um forystu fyrir samfélagið. 

Léttum byrðarnar

Mikilvægt er að lækka skatta og gjöld á íbúa. Við ætlum að byrja á að lækka fasteignaskatta á íbúðarhúsnæði og verðum með augun á öðrum útgjöldum sem tengjast fjölskyldum og fyrirtækjum. Með lækkun fasteignagjalda á heimili tryggjum við að allir þeir sem eiga húsnæði njóti góðs af, óháð aldri og fjölskyldusamsetningu. 

Markviss innviðauppbygging

Við þurfum að huga að uppbyggingu innviða. Gerð 10 ára framkvæmdaáætlunar og uppbygging á grunni hennar skilar okkur fram á veginn. Sveitarfélagið verður að koma verkefnum í framkvæmd og ljúka þeim. Þannig fá íbúar betra samfélag og við verðum samkeppnishæfari í að laða að okkur nýja íbúa.

Verjum hagsmuni 

Grynnslin við Hornafjarðarós, að Vatnajökulsþjóðgarður styðji við heimamenn innan þjóðgarðsins og að landbúnaður dafni eru lykilþættir í framþróun byggðarinnar. Við þurfum að styðja við fjölbreytt og blómlegt atvinnulíf ásamt því að verja grundvallar stofnanir innan sveitarfélagsins og styrkja þær. Framhaldsskólinn er mikilvægur fyrir okkur og nýir nemendagarðar myndu efla hann.

Menntun fyrir alla til framtíðar

Við viljum bjóða börnunum okkar sterkan grunn fyrir framtíðina. Það þarf víða að taka til hendinni í húsnæðis- og lóðamálum skólanna ásamt því að hlúa að góðri stoðþjónustu og efla sérstaklega list-, verk- og raungreinar. Mikilvægt er að öll börn hafi jöfn tækifæri, þar á meðal þau sem hafa annað móðurmál og nauðsynlegt að tryggja þeim markvissa aðlögun að samfélaginu.

Við þurfum áfram að tryggja leikskólapláss barna frá 12 mánaða aldri, hlúa að faglegu starfi á leikskólum og tryggja áfram öflugt starf tónskólans.

Skilvirkni og þjónusta í stjórnsýslunni

Við viljum byggja upp sveitarfélag þar sem stjórnsýsla er einföld, skilvirk og þjónustumiðuð. Reglulegar viðhorfskannanir tryggja að rödd íbúa heyrist og hafi raunveruleg áhrif. Jafnframt viljum við styrkja íbúaráð og tryggja virkt samtal við alla hópa samfélagsins.

Velferð og lifandi samfélag

Heilsa og velferð íbúa eru lykilatriði. Við viljum veita fjölbreyttu íþróttastarfi góðan aðbúnað, byggja nýtt íþróttahús sem uppfyllir kröfur til framtíðar, setja gervigras á Sindravelli ásamt fleiru. Það er m.a. liður í að fækka ferðalögum barna og unglinga um langar vegalengdir. Við þurfum að tryggja að öll börn geti tekið þátt í frístundum og sporna við brottfalli úr íþróttum. Með áherslu á lýðheilsu og uppbyggingu á útivistarsvæðum stuðlum við að virkni fyrir alla aldurshópa. Þá munum við skoða leiðir til að efla heilsuþjálfun eldri borgara í dreifbýli t.d. með fjarkennslu ef vilji er fyrir hendi.

Við viljum efla menningarstarf og gera söguna sýnilegri, m.a. í Gömlubúð og Miklagarði.

Á sama tíma leggjum við áherslu á öfluga velferðarþjónustu, aukið aðgengi að heilbrigðisþjónustu og stuðning við eldri íbúa og viðkvæma hópa.

Með samstilltu átaki byggjum við upp öflugt samfélag þar sem allir geta dafnað.

Hjalti Þór Vignisson, 1. sæti og bæjarstjóraefni

Ingibjörg Sveinsdóttir, 2. sæti

Björgvin Óskar Sigurjónsson, 3. sæti

Kolbrún Þorbjörg Björnsdóttir, 4. sæti

Ég heiti Finnur Smári Torfason og skipa 6. sæti  á lista Framsóknar og stuðningsmanna.

Ég er rafmagns- og tölvuverkfræðingur að detta í fertugt síðar á þessu ári.  Ég er giftur Steinunni Hödd Harðardóttur, aðstoðarskólastjóra í Grunnskóla Hornafjarðar. Saman eigum við Hörð Þór, 15 ára, og Ídu Lúcíu, 10 ára, og hundinn Dana. 

Ég er fæddur og uppalinn hér á Höfn og hér hefur mér alltaf þótt best að búa. Eftir útskrift úr FAS fluttumst við Steinunn til Reykjavíkur til þess að stunda frekara nám, en ég útskrifaðist með B.Sc. gráðu í rafmagns- og tölvuverkfræði frá Háskóla Íslands árið 2009. Ári síðar fluttum við til Kaupmannahafnar þar sem ég stundaði nám í DTU í rafmagnsverkfræði með áherslu á sjálfvirkni og vélmenni. Ég útskrifaðist þaðan árið 2012, eftir að hafa skrifað mastersritgerð í samstarfi við Lego, en verkefnið snérist um að koma ákveðinni tækni inn í lítinn lego kubb. Það er gaman að segja frá því að núna í mars, 14 árum síðar, kom á markað kubbur sem byggir að hluta til á minni vinnu.

Fljótlega eftir að við fluttum heim fór ég í framboð fyrir Framsókn og stuðningsmenn. Fyrsta kjörtímabilið mitt var ég formaður umhverfisnefndar, og síðar varaformaður umhverfis- og skipulagsnefndar. Á síðasta kjörtímabili var ég varamaður í sömu nefnd. Umhverfis- og skipulagsmál eru mér hugleikin. Ég tel að Sveitarfélagið Hornafjörður standi framarlega í mörgu er varðar umhverfis og skipulagsmál, en betur má ef duga skal. Við stöndum frammi fyrir mörgum áskorunum á næstu árum og það er nauðsynlegt að hafa skýra og sterka stefnu í þeim málum.

Eftir að ég flutti heim gekk ég til liðs við Björgunarfélag Hornafjarðar, og árið 2020 varð ég formaður félagsins, og sinni því hlutverki ennþann dag í dag. Starf björgunarfélaga er mikilvægt, ekki síst á svæðum eins og okkar þar sem félagið sinnir margskonar verkefnum á viðfeðmu svæði. 

Áhugamálin mín eru fyrst og fremst útivist og veiði, en einnig hef ég gaman að íþróttum og þá sér í lagi fótbolta og körfubolta. Ferðalög eru einnig sameiginlegt áhugamál fjölskyldumeðlima, og gildir þá einu hvort þau eru innanlands eða utan.

Það eru ekki margir sem vita við hvað ég starfa svona dagsdaglega. Ég vill því meina að ég sé Chandler Bing okkar Hornfirðinga, en fyrir þá sem ekki vita hver það er, þá er hann persóna í sjónvarpsþáttunum Friends sem enginn vissi við hvað starfaði. Fyrir áhugasama, þá starfa ég sem bakenda verkfræðingur hjá sænsku fyrirtæki sem heitir Kivra. Kivra er stafrænt pósthólf, ekki ósvipað island.is. Mitt hlutverk í fyrirtækinu er að sjá til þess að Svíar hafi greiðan aðgang að öllum sínum kvittunum á einum og sama stað.

Finnur Smári Torfason 6. sæti hjá Framsókn og stuðningsmönnum

Ég heiti Þórdís Þórsdóttir og skipa 8.sæti lista Framsóknar og stuðningsmanna þeirra.

Ég er 43 ára og starfa sem skólastjóri Grunnskóla Hornafjarðar. Ég er gift Guðjóni Björnssyni húsasmið og saman eigum við tvö börn, Garp 13 ára, Sólrúnu Huld 10 ára og hundinn Millu. Ég er fædd og uppalin í Reykjavik, gekk í Seljaskóla í Breiðholti en flutti um 12 ára aldur í Grafarvog. Foreldrar mínir eru Sólrún Guðjónsdóttir og Þór Benediktsson, ég á eina systir Brynhildi G. Þórsdóttir.

Ég lauk stúdentsprófi af félagsfræðibraut og iðnprófi í margmiðlunarhönnun frá Borgarholtsskóla, lauk svo námi B.ed í grunnskólakennarafræðum og er með framhaldsnám í sérkennslufræðum. Ég elska að lesa og hef sérstaklega gaman að ævisögum og bókum sem byggðar eru á sönnum atburðum.

Mín helstu áhugamál snúa að ferðalögum og heilsu, hvort sem það er mataræði, hreyfing eða samvera með fjölskyldunni. Ég er með mikla ferðabakteríu og hef m.a. ferðast til Ástralíu, Nýja-Sjálands og sinnt sjálfboðaliðastarfi í Costa rica. Þegar ég var yngri æfði ég dans og handbolta með ÍR. Að dansa hefur alltaf veitt mér mikla gleði og fékk ég tækifæri til þess að kenna Zumba hér á Höfn fyrir nokkrum árum.

Það eru 17 ár síðan ég flutti til Hafnar og hér hef ég valið að búa og ala upp börnin mín, það er í mínum huga ákveðin forréttindi að búa á Hornafirði, hér er mikil náttúrufegurð og almennt gott samfélag. Það skiptir mig máli hvernig samfélagið þróast og langar mig að taka þátt í því að gera Höfn að ákjósanlegum stað til að búa á. Því hef ég ákveðið að bjóða áfram krafta mína í framboði fyrir Framsókn og stuðningsmenn þeirra. Ég óska því eftir stuðningi þínum kæri kjósandi í sveitarstjórnakosningum þann 16.maí næstkomandi.

Þórdís Þórsdóttir 8. sæti hjá Framsókn og stuðningsmönnum

Ég skipa 5. sæti lista Framsóknar og stuðningsmanna. Ég er búsettur í Nesjum, er menntaður sjávarútvegsfræðingur og starfa hjá Skinney-Þinganesi. Ég sleit barnsskónum á Höfn og lauk stúdentsprófi frá FAS. Skólavistin á Höfn líkaði mér vel, litlir skólar þar sem sveigjanleiki var í boði og samtal við kennara almennt ágætt. Auk bóknáms lagði ég stund á píanónám og tók þátt í leiklistarhópum skólanna.

Að loknu stúdentsprófi hélt ég út fyrir landsteinana, starfaði á hrossabúi í Þýskalandi auk þess sem ég fór í bakpokaferðalag um Evrópu. Síðar starfaði ég við tamningar á Suðurlandi og í Danmörku og fór á sjóinn utan annatíma í hestamennskunni þar til ég hóf nám við sjávarútvegsfræði í Háskólanum á Akureyri haustið 2013. Þaðan útskrifaðist ég vorið 2016 en í desember 2015 fluttist ég heim og hóf störf hjá Skinney-Þinganesi þar sem ég hef starfað síðan.

Ég fluttist í Nesin haustið 2017 þar sem ég bý með hesta og kindur og er orðinn Nesjamaður inn að beini. Þar legg ég stund á mína hestamennsku en einnig hef ég reynt að verða að liði í smalamennskum með hundinn minn Bjarna mér við hlið. Þar að auki spila ég undir hjá Gleðigjöfum, kór eldri borgara á Höfn, sem er gefandi starf.

Ég er nú að sigla inn í mitt annað kjörtímabil en kjörtímabilið sem er nú að renna sitt skeið hefur verið mér mjög lærdómsríkt. Vikulegir undirbúningsfundir fyrir bæjarráðsfundi með Ásgerði, Björgvini og Gunnhildi, sem öll hafa góða reynslu af sveitarstjórnarmálunum, hafa kennt manni mikið og haldið manni upplýstum um þau mál sem hafa verið í gangi hverju sinni þannig að það hefur verið tiltölulega auðvelt að stíga upp sem varamaður þegar svo hefur borið undir. Vil ég nota tækifærið og þakka þeim fyrir samstarfið en Ásgerður og Gunnhildur hafa báðar ákveðið að segja skilið við pólitíkina – að sinni.

Auk þess að hafa verið varamaður í bæjarstjórn fékk ég það traust að sitja bæjarráðsfundi í fjarveru Ásgerðar og Björgvins. Einnig sat ég sem aðalmaður í atvinnu- og menningarmálanefnd. Það starf hefur gengið vel þó svo að maður hefði viljað sjá meiri þunga í málaflokkinn frá sitjandi meirihluta en Menningarmiðstöð Hornafjarðar býr í dag að mjög góðu starfsfólki sem hefur leitt þá vinnu sem er í gangi og eiga heiður fyrir.

Um miðjan næsta mánuð göngum við að kjörborðinu og höfum fjóra valkosti í boði. Framsókn og stuðningsmenn leggja fram lista sem er skipaður fólki sem hefur blandaða reynslu af sveitarstjórnarmálum en eiga öll það sameiginlegt að hafa reynslu af því að láta verkin tala. Það er mikilvægt að hafa fólk í brúnni sem kemur hlutunum í verk og í það erum við tilbúin. Setjum X við B á kjördag, lækkum álögur á íbúa og framkvæmum með hagsmuni íbúa sveitarfélagsins alls í forgrunni.

Gunnar Ásgeirsson 5. sæti hjá Framsókn og stuðningsmönnum

Ég er Lena Hrönn Marteinsdóttir og skipa 9. sæti B-lista Framsóknar og stuðningsmanna. Ég er fædd og uppalin í Ártúni í Nesjum en fluttist á Höfn að loknu námi. Þar bý ég enn með manni mínum Jóni Birni Jónssyni og tveimur sonum, Ívari Erni og Adam Hrafni. 

Ég útskrifaðist sem stúdent frá FAS. Ég er með MA-próf í félagsráðgjöf til starfsréttinda og hef starfað í Grunnskóla Hornafjarðar óslitið frá því að ég kom heim úr námi 2011. Þar hef ég sinnt námsráðgjöf, kennslu og lengi haldið utan um innra mat skólans. Þá hef ég einnig tekið mikinn þátt í rekstri gistingar og veitingastaðar í félagi við fjölskylduna mína. Ég kenni líka Hornfirðingum crossfit fyrir birtingu alla virka daga. Að auki höldum við um 150 fjár á æskuheimilinu Ártúni.

Í frístundum stunda ég crossfit af kappi, ég sinni félagsstörfum, var um nokkurt skeið gjaldkeri í Hestamannafélaginu Hornfirðingi en er nú ritari í yngriflokkaráði knattspyrnudeildar Sindra. 

Líf mitt og okkar fjölskyldunnar hverfist að mörgu leyti um íþróttir þar sem drengirnir okkar stunda bæði knattspyrnu og körfubolta og höfum við foreldrarnir mikla ánægju af því að fylgja þeim í það sem því fylgir. Nú og ef ekki er verið að stunda íþróttirnar þá er verið að horfa á þær. Við fjölskyldan erum einnig fastagestir í sundlaug Hornafjarðar, en þar þykir okkur ákaflega gott að ljúka annasömum dögum, láta líða úr okkur og ræða samfélagsmálin.

Ég hef ríkan áhuga á að vinna að eflingu lýðheilsu í sveitarfélaginu, þar sem ég tel forvarnir vera einn mikilvægasta þáttinn í velferð barna og unglinga. Að mínu mati felst ein besta forvörnin í því að tryggja aðgengi að skipulögðu íþrótta- og tómstundastarfi og styðja við góða samveru fjölskyldna. Slíkt umhverfi stuðlar að bættri líkamlegri og andlegri heilsu og leggur grunn að heilbrigðum lífsvenjum til framtíðar.

Hafandi starfað innan grunnskólans frá útskrift eru mennta- og fræðslumál mér ofarlega í huga. Framhaldsskólinn okkar er mér hugleikinn. Hann hefur ekki staðið traustum fótum síðustu misseri og er til mikils að vinna að styðja við hann með þeim leiðum sem eru færar. Það yrði gríðarleg skerðing fyrir samfélagið ef sveitarfélagið hefði ekki framhaldsskóla. Starfandi innan elstu deildar grunnskólans hef ég lagt mig fram við að tala upp framhaldsskólann okkar og hans styrkleika og mun halda því áfram.

Jafnframt hef ég áhuga á velferðarmálum og vil beita mér fyrir öflugu og aðgengilegu stuðningskerfi fyrir íbúa sveitarfélagsins. Sem menntaður félagsráðgjafi hef ég öðlast dýrmæta innsýn í aðstæður og þarfir einstaklinga og fjölskyldna og mikilvægi þess að tryggja jöfn tækifæri, öryggi og góða þjónustu.

Ég legg einnig áherslu á uppbyggingu innviða í takt við vaxandi fjölda ferðamanna á svæðinu. Mikilvægt er að sveitarfélagið sé vel í stakk búið til að taka á móti auknu álagi með markvissri skipulagningu, bættri aðstöðu og skýrum lausnum sem þjóna bæði íbúum og gestum.

Að lokum vil ég sjá meiri skilvirkni í stjórnsýslu sveitarfélagsins, þar sem gagnsæi, hraði og fagmennska eru höfð að leiðarljósi. Með einfaldari ferlum og betri nýtingu fjármuna getum við bætt þjónustu og aukið traust íbúa á stjórnsýslunni.

Mér þykir afskaplega vænt um bæinn minn og samfélagið okkar og vil að Hornafjörður sé góður og aðlaðandi staður til að búa á fyrir alla, með ríka áherslu á velferð, lýðheilsu, góða innviði og skilvirka þjónustu.

Lena Hrönn Marteinsdóttir 9. sæti hjá Framsókn og stuðningsmönnum

Ég heiti Reynir Arnarson og skipa 13. sæti lista Framsóknar og stuðningsmanna þeirra. Ég er kvæntur Svandísi Guðnýju Bogadóttur og eigum við þrjá syni og barnabörnin eru alls ellefu.

Ég fæddist á Vopnafirði 1956, en fjölskyldan fluttist til Hafnar þegar ég var þriggja ára. Skólagangan var hefðbundin hér á Höfn, síðan vetur á Reykholti auk náms til vélstjóra. Ég var í sveit í Suðursveit, Lóni og Mýrum fram á unglingsár en þaðan lá leiðin á sjóinn en það var draumur margra ungra manna á þeim tíma og er jafnvel enn. Sjómennskan varði í 30 ár en að henni lokinni höfum við Svandís aðallega starfað við ferðaþjónustu og ýmislegt tengt henni þar til nú nýverið að við höfum að mestu dregið okkur í hlé frá daglegu amstri á þeim vettvangi.

Við sveitarstjórnarkosningarnar árið 2002 var ég á lista Framsóknar hér og var fulltrúi í sveitarstjórn í 12 ár eða til ársins 2014, þar af 8 ár forseti bæjarstjórnar eða formaður bæjarráðs, einnig átti ég sæti í hafnarstjórn frá árinu 1988 til 2022.

,,Að fortíð skal hyggja þá framtíð skal byggja” tel ég nauðsynlegt svo við lærum og gerum síður mistök við ákvarðanir til framtíðar.

Reynir Arnarson 13. sæti hjá Framsókn og stuðningsmönnum á Hornafirði

Ég heiti Haukur Ingi Einarsson og skipa 12 sæti lista Framsóknar og stuðningsmanna þeirra. Ég er 45 ára, giftur Berglindi Steinþórsdóttur ferðamálafræðingi og kennara og eigum við saman þrjú börn, Tómas Nóa, Anrey og Steinþór. 

Ég fæddist í Reykjavík 1980, en fluttist á Höfn tveggja ára gamall og ólst þar upp. Ég hef svo í seinni tíð notið þeirra forréttinda að vera með annan fótinn í Suðursveit þar sem við hjónin rekum tvö fyrirtæki. Glacier Adventure sem er afþreyingar ferðaþjónusta og Skyrhúsið sem er gistiheimili. Ég er hagfræðingur að mennt, en einnig Jöklaleiðsögumaður, foreldrar mínir eru Einar Sveinn Ingólfsson og Ingibjörg Hauksdóttir og tengdaforeldrar mínir eru þau Steinþór Torfason á Hala og Ólöf Anna Guðmundsdóttir á Hala. 

Ég sótti leikskólann Lönguhóla sem barn og gekk í gegnum Hafnarskóla og Heppuskóla. Ég tók virkan þátt í íþróttastarfi og spilaði knattspyrnu með Sindra. Eftir nám, kom ég til baka og vann hjá Sveitarfélaginu Hornafirði sem Framkvæmdastjóri Fjármála- og framkvæmdasviðs og öðlast þar dýrmæta reynslu úr sveitarstjórnarmálum og rekstur sveitarfélagsins Hornafjarðar. 

Svæðið er mér afar mikilvægt og kært, ég hef gefið tíma minn til félagsstarfa svo sem verið í stjórn Knattspyrnudeildar Sindra, gegnt formennsku í Ríki Vatnajökuls og endurvakti Ferðamálafélag Austur Skaftafellssýslu og sinnti þar formennsku. 

Ég vill styðja við þetta góða fólk sem skipar lista Framsóknar og stuðningsmanna þeirra með minni þekkingu, reynslu og brennandi áhuga á að skapa aðstæður fyrir Hornafjörð að vera framúrskarand búsetu svæði og þar sem þrífast öflug og sjálfbær atvinnutækifæri.

Haukur Ingi Einarsson 12. sæti hjá Framsókn og stuðningsmönnum á Hornafirði