Hornafjörður – til sjávar og sveita

Skráð af
ritstjorn
-
Gunnar Ásgeirsson

Gunnar Ásgeirsson heiti ég og skipa 3. sæti lista Framsóknar og stuðningsmanna þeirra. Ég er uppalinn Hafnarbúi en er nú búsettur í Nesjum. Ég er menntaður sjávarútvegsfræðingur og er mitt aðalstarf við sjávarútveg. Einnig er ég með búskap heima þar sem ég bý með nokkrar kindur, hross og tvo fjárhunda. Búskapurinn, ásamt útivist og tónlist eru mín aðal áhugamál. Í gegnum tíðina hef ég verið þáttakandi í tónlistarlífi á Höfn, meðal annars sem undirleikari hjá Gleðigjöfum, kór eldri Hornfirðinga frá 12 ára aldri, þó með hléum.

Hlúum að atvinnu í sveitum

Í sveitarfélaginu hefur atvinnuástand verið gott þó svo að heimsfaraldurinn hafi sett strik í reikninginn síðastliðin tvö ár. Á sama tíma sköpuðust tækifæri. Hér hafa skapast ný störf, sum hefðbundin en önnur ný fyrir tilstuðlun nýsköpunar og þróunar. Það er mikilvægt fyrir okkar samfélag að hér séu frumkvöðlar studdir sín fyrstu skref. Í sveitum hefur bændum farið fækkandi á síðustu misserum og eru blikur á lofti um að þróunin verði þannig áfram, landbúnaðarkerfið á Íslandi er þungt og verð á aðföngum hækkar. Okkur er nauðsynlegt að halda byggð í sveitum og reynir því á íbúa sveitanna að hugsa út fyrir rammann til að sjá sér fyrir lífsviðurværi. Síðastliðið haust lauk hér langri sögu búfjárslátrunar. Þurfa því bændur nú að senda búpening sinn um langan veg til að fá þeim slátrað. Á teikniborðinu er þjónustusláturhús sem á að rísa á Höfn. Það er draumur minn að bændur sjái tækifæri í því og muni nýta sér þá þjónustu til að byggja upp aðstöðu til matvælavinnslu heima fyrir og tryggja með því atvinnu og auka verðmætasköpun hér á svæðinu sem er mikilvægt. Sveitarfélagið hefur einnig greitt götu þeirra sem sækjast í störf án staðsetningar. Þar er sóknartækifæri fyrir Hornfirðinga og er vonandi að sem flestir nýti sér í framtíðinni að geta búið í Sveitarfélaginu Hornafirði og stundað atvinnu við hæfi. 

Hugsum stórt og stækkandi

Á kosningadag, þann 14. maí næstkomandi, gefst íbúum sveitarfélagsins tækifæri til að kjósa um nýtt aðal- og deiliskipulag um þéttingu byggðar í Innbæ. Þar er kosið samkvæmt ósk íbúa og er liður í auknu samtali við íbúa sem Framsókn og stuðningsmenn þeirra hafa stuðlað að m.a. með breytingu á hlutfalli kjósenda sem óskað geta eftir almennri atkvæðagreiðslu samkvæmt 65. gr. í samþykktum sveitarfélagsins úr 25% í 20%. Þétting byggðar á Höfn hefur verið í umræðunni í langan tíma og er kominn tími á að niðurstaða fáist svo hægt sé að halda áfram veginn. Á síðustu árum hefur mikil uppbygging átt sér stað í sveitarfélaginu, hvor tveggja í þéttbýli og dreifbýli. Engin teikn eru á lofti um að áhugi á frekari uppbyggingu fari dvínandi. Því verður að skipuleggja stærra og meira íbúðahverfi á Höfn og verður það að gerast hratt. Í nýju skipulagi þarf að gera ráð fyrir nýjum þjóðvegi í þéttbýli, sem er brýnt að við fáum í gegn fljótt þar sem það er grundvöllur þess að losna við þungaumferð í gegnum bæinn og stuðla þannig að auknu umferðaröryggi. Þungaumferð í kringum skóla og íþróttamannvirki þar sem unga fólkið okkar er gangandi er ekki boðleg. Í nýju skipulagi þarf einnig að gera ráð fyrir annarri þjónustu og innviðum til að anna vaxandi samfélagi. Ekki má gleyma uppbyggingu í sveitum, en halda þarf áfram með deiliskipulagningu í dreifbýli svo fólki gefist kostur á að byggja sér híbýli utan þéttbýlisins. Í skipulagsmálum þarf að hugsa stórt til að hlúa að þeim vilja til uppbyggingar sem hefur verið hér til staðar á síðustu misserum.

Hvað er best að kjósa?

Það er mikilvægt fyrir íbúa sveitarfélagsins að hafa á bak við sig þéttan og breiðan hóp fólks sem samanstendur af reynslumiklu fólki í sveitarstjórnarmálum og öðrum sem koma ferskir inn í starfið með nýja sýn á hlutina. Á lista Framsóknar og stuðningsmanna þeirra er fólk sem kemur úr öllum áttum en á það sameiginlegt að láta sig byggðina sína og þróun hennar varða.

Gunnar Ásgeirsson, bóndi og vinnslustjóri
3. sæti Framsóknar og stuðningsmanna þeirra

Miðsvæði Hafnar – íþróttamannvirki

Skráð af
ritstjorn
-

Lengi vel hefur verið kallað eftir framtíðarsýn hjá sveitarfélaginu varðandi helstu framkvæmdir og er hún nú á lokametrunum hvað varðar miðsvæði Hafnar, þótt að vissulega hafi hún tekið lengri tíma en áætlað var. Um er að ræða áætlun og framtíðarsýn til næstu áratuga.

Mánudaginn 21. mars var kynningarfundur í Heppuskóla á deiliskipulagi á miðsvæði Hafnar og teikningum á fyrirhugaðri viðbyggingu við Sundlaug Hafnar fyrir líkamsræktaraðstöðu. Með umræddu deiliskipulagi er horft til framtíðar í bæði íþrótta- og skólamálum með heildstæða nálgun að markmiði.

Við skipulagsvinnuna hafa börn og ungmenni í Grunnskóla Hornafjarðar verið sérstaklega boðin til þátttöku þar sem skipulagsstjóri heimsótti alla bekki grunnskólans, safnaði upplýsingum og ábendingum frá nemendum sem teknar eru með í vinnuna.

Góð mæting var á kynninguna auk þess sem henni var einnig streymt. Umræðan á fundinum var að mestu um forgangsröðun milli íþróttahúss og skólahúsnæðis. Eftir kynninguna hafa komið fram ýmsar vangaveltur varðandi forgangsröðun uppbyggingar samkvæmt deiliskipulaginu sem ekki voru bornar fram á fundinum.

Sundlaug og líkamsrækt

Fljótlega í skipulagsferlinu var ljóst að menn vildu sjá líkamsræktina í tengslum við sundlaugina og var hún staðsett vestan við sundlaugina. Með því er hægt að samnýta búningsklefa með sundlauginni. Sú staðsetning gerir það að verkum að hægt var að hefja vinnu við hönnun líkamsræktar mun fyrr en ella, þ.e. samhliða deiliskipulaginu. Með því nýttist tíminn á meðan verið var að skoða málin varðandi húsnæðisþörf grunnskólans til framtíðar og síðan skipuleggja svæðið undir skólann innan um íþróttamannvirkin þannig að eitt útilokaði ekki annað. Mikilvægt er að ítreka að unnið var eftir niðurstöðum þarfagreiningar stýrihóps sem leiddi í ljós að stærð líkamsræktar þyrfti að vera um 600 fm. Fyrirhuguð bygging er um 680 fm. með hugsanlegum stækkunarmöguleika til vesturs.

Auk þessa felur viðbygging við sundlaugina í sér tækifæri til að bæta við nýrri búningsaðstöðu fyrir fatlaða, þá sem þurfa aðstoð einstaklings að gagnstæðu kyni í búningsklefa og/eða vegna einhverra annarra ástæðna geta ekki nýtt karla- eða kvennaklefa. Með þessu bætir sveitarfélagið aðgengi allra að sundlauginni.

Íþróttahús

Uppbygging samkvæmt deiliskipulaginu mun fara fram í nokkrum áföngum. Líkamsræktaraðstaðan er fyrsti áfangi að óbreyttu. Nýtt íþróttahús sem inniber einnig vallarhús og stúku fyrir Sindravelli er í dag á 3 ára framkvæmdaáætlun sveitarfélagsins. Gert er ráð fyrir hönnun á næsta ári og að framkvæmdir eigi að geta hafist árið 2024. Íþróttahúsið okkar er barn síns tíma og löngu kominn tími á úrbætur.  Salurinn er lítill og áhorfendaaðstaðan ekki góð.  Eftir gott gengi í meistaraflokki karla í körfubolta og öflugu starfi í blakdeildinni undanfarin ár er eðlilegt að undiraldann um nýtt íþróttahús sé sterk.  

Gervigras

Þá hefur líka verið lagt inn í umræðuna að mikilvægt sé að setja gervigras á Sindravelli vegna þess að KSÍ stefnir nú á að hefja Íslandsmót í knattspyrnu í mars á 11 manna velli.  Flest svæði á Íslandi búa við aðgengi að 11 manna gervigrasvelli en eins og staðan er í dag þá þurfa okkar iðkendur annaðhvort að fara um langan veg á Austfirði eða á Selfoss til að spila á slíkum velli.  Ef við gerum ekkert þá þurfa bæði yngri- og meistaraflokkar að spila fyrstu heimaleiki tímabilsins utan sveitarfélagsins. Mikill áhugi er á því að leysa þetta mál sem fyrst. Verið er að afla upplýsinga um kostnað við slíka framkvæmd til að átta sig á umfangi þess.

Ábyrg fjármálastjórn

Best væri að geta gert allt strax.  Við viljum hins vegar tryggja að fjármál bæjarins séu í góðu horfi eins og við teljum okkur geta státað af síðustu ár.  Við höfum afl til að framkvæma en það þarf að gera á ábyrgan hátt, að undangengnu samráði og samtali við alla hagsmunaaðila. Við teljum okkur hafa lagt okkur fram við það en erum auðvitað alltaf reiðubúinn að bregðast við aðstæðum, hlusta á rök og sjónarmið annarra í þessu máli sem öðrum.

Ásgerður K. Gylfadóttir, formaður bæjarráðs, Björgvin Óskar Sigurjónsson, varaformaður bæjarráðs og fræðslu- og tómstundanefndar og Íris Heiður Jóhannsdóttir, formaður fræðslu- og tómstundanefndar. Höfundar eru einnig frambjóðendur Framsóknar og stuðningasmanna í 1., 2. og 5. sæti fyrir sveitarstjórnarkosningarnar 14. maí n.k.

Er ekki bara best að taka þátt!

Skráð af
ritstjorn
-

Nú er undirbúningur kosninga 14. maí n.k. kominn á fulla ferð. Öflugur hópur frambjóðenda vinnur nú málefnavinnu þar sem viðhorf þeirra sem eru að koma nýjir inn í sveitarstjórnarmálin og reynsla þeirra sem hafa verið á þeim vettvangi er lögð saman.

Framboð Framsóknar og stuðningsmanna þeirra vill gjarnan bjóða íbúum að taka þátt í vinnunni og heyra þeirra sjónarmið til málefna sveitarfélagsins. 

Á morgun laugardaginn 2. apríl verður opinn málefnafundur framboðsins í kosningaskrifstofunni okkar frá kl.11-13 sem að þessu sinni verður í Viðreisn, kaffistofunni í skemmunni við Víkurbaut. Ég hvet íbúa til að mæta og taka þátt í að móta stefnu Framsóknar og stuðningsmanna til næstu fjögurra ára.

Staða fatlaðs fólks í sveitarfélögunum

Í gær fimmtudaginn 31. mars buðu Öryrkjabandalag Íslands og Landssamtökin Þroskahjálp til opins fundar með framboðum til sveitarstjórnar í Nýheimum á Höfn. Fulltrúar ÖBÍ og Þroskahjálpar fluttu erindi fyrir okkur og köllu eftir áherslum framboðanna í málefnum fatlaðs fólks.

Margar góðar ábendingar komu fram  um það sem vel er gert og hvað betur má fara bæði í þjónustu við fatlaða og varðandi upplýsingagjöf. Fundurinn var mjög upplýsandi og áhugaverður og mun nýtast vel í málefnavinnunni framundan í velferðarmálum.

Það er mjög gott bæði fyrir okkur frambjóðendur og félagasamtök sem þessi að koma saman og fara yfir stöðu mála, áskoranir og tækifæri.

Ásgerður K. Gylfadóttir, formaður bæjarráðs og frambjóðandi í 1. sæti Framsóknar og stuðningsmanna þeirra í Sveitarfélaginu Hornafirði

Öflug Framsókn í Sveitarfélaginu Hornafirði

Skráð af
ritstjorn
-

Framboðslisti Framsóknar og stuðningsmanna þeirra fyrir sveitarstjórnarkosningarnar 14. maí n.k. var samþykktur á félagsfundi Framsóknarfélags Austur-Skaftfellinga þann 24. mars sl.

Ásgerður Kristín Gylfadóttir, hjúkrunarfræðingur og formaður bæjarráðs leiðir listan, í öðru sæti er Björgvin Óskar Sigurjónsson, byggingartæknifræðingur og bæjarfulltrúi, í þriðja sæti er Gunnar Ásgeirsson, vinnslustjóri hjá Skinney Þinganesi hf. og í fjórða sæti er Gunnhildur Imsland, heilbrigðisgagnafræðingur hjá HSU á Höfn.

Listann skipar kraftmikill hópur reynslumikils fólks og nýliða, með fjölbreyttan bakgrunn sem brennur fyrir öflugu og góðu samfélagi í Sveitarfélaginu Hornafirði. Kosningaskrifstofa framboðsins verður í Viðreisn, kaffistofunni í skemmum við Víkurbraut 1.

Framundan eru fundir með íbúum um málefni sveitarfélagsins þar sem áhugasömun gefst tækifæri til að taka þátt í sefnu framboðsins og þau verkefni sem framundan eru.

Listinn í heild sinni:

1. Ásgerður Kristín Gylfadóttir, 53 ára. Hjúkrunarfræðingur og formaður bæjarráðs.

2. Björgvin Óskar Sigurjónsson, 40 ára. Byggingartæknifræðingur og bæjarfulltrúi.

3. Gunnar Ásgeirsson, 31 árs. Vinnslustjóri hjá Skinney-Þinganesi hf.

4. Gunnhildur Imsland, 53 ára Heilbrigðisgagnafræðingur hjá HSU á Höfn.

5. Íris Heiður Jóhannsdóttir, 46 ára. Framkvæmdastjóri IceGuide ehf.

6. Finnur Smári Torfason, 35 ára. Tölvunarfræðingur hjá Kivra.

7. Þórdís Þórsdóttir, 39 ára. Sérkennari hjá Grunnskóla Hornafjarðar.

8. Bjarni Ólafur Stefánsson, 36 ára. Vinnslustjóri hjá Skinney-Þinganesi hf.

9. Guðrún Sigfinnsdóttir, 50 ára. Móttökuritari hjá HSU á Höfn.

10. Arna Ósk Harðardóttir, 53 ára. Skrifstofumaður hjá Rafhorn ehf.

11. Lars Jóhann Andrésson Imsland, 47 ára. Framkvæmdastjóri East Coast Travel ehf.

12. Aðalheiður Fanney Björnsdóttir, 50 ára. Leikskólakennari á Sjónarhóli á Höfn.

13. Nejra Mesetovic, 25 ára. Ferðamálafræðingur og verkefnastjóri hjá Markaðsstofu Suðurlands.

14. Ásgrímur Ingólfsson, 55 ára. Skipstjóri á Ásgrími Halldórssyni SF-250 og forseti bæjarstjórnar.

Stjórn Framsóknarfélags Austur- Skaftfelinga.

Hringrásarhagkerfi, skref fyrir skref

Skráð af
ritstjorn
-

Umhverfis- og loftslagsmál eru ein af megin stoðum stefnumótunar sveitarfélagsins –„Hornafjörður, náttúrulega!“ Þar er áherslan á að sveitarfélagið sé leiðandi í umhverfis- og loftslagsmálum. https://www.hornafjordur.is/media/stefnur/20210622-Hornafjordur-natturulega.pdf

Unnið hefur verið að fjölmörgum skrefum að bættri úrgangsstjórnun í átt að hringrásarhagkerfinu á síðustu árum með góðum árangri á fjölmörgum sviðum.  Sorpflokkun við heimili hefur fest sig í sessi og hafa íbúar staðið sig vel. 

Sameiginlegt verkefni

Um tuttugu fyrirtæki taka þátt í Loftslagsyfirlýsingu Sveitarfélagsins Hornafjarðar og Festu – miðstöðvar um sjálfbærni og samfélagsábyrgð, um stuðning við loftslagsaðgerðir fyrirtækja og stofnanna í sveitarfélaginu sem undirrituð var þann 26. febrúar 2021.

Auk þessa eru ýmis verkefni í gangi í sveitarfélaginu á vegum íbúa og félagasamtaka s.s. Hirðingjarnir, Pokastöðin Hornafjörður, Gróska – félagslandbúnaður og Umhverfissamtök Austur-Skaftafellssýslu sem miða öll að eflingu hringrásarhagkerfisins með endurnýtingu og sjálfbærni að leiðarljósi.

Öll þessi verkefni styðja við þá stefnu að Sveitarfélagið Hornafjörður sé framfaradrifið sjálfbært fyrirmyndar samfélag þar sem fólk býr í sátt og samlyndi við náttúruna. 

Greining úrgangsstrauma

Í júlí 2021 fékk sveitarfélagið styrk frá Umhverfis- og auðlyndaráðuneytinu í verkefnið Nytjasmiðja Hornafjarðar, hluti af því er að greina úrgangsstrauma í sveitarfélaginu. Þar með talið þróun úrgangsmála, m.t.t.  magns endurvinnslu og urðunar sorps. Greiningarvinnan er langt komin og benda fyrstu niðurstöður til þess að bæta þurfi ferla við skráningu og móttöku sorps frá fyrirtækjum og stofnunum. 

Ný löggjöf tekur gildi

Þann 1. janúar 2023 taka gildi ný lög til eflingar hringrásarhagkerfisins sem miða að því að gera enn betur í endurnotkun, endurvinnslu og að draga úr urðun sorps. Greiningin sem unnið er að og þær úrbætur sem koma í kjölfarið munu auðvelda sveitarfélaginu að aðlagast þeim breytingum sem innleiðing langanna kallar á. Áherslan er á að „þeir borga sem menga“ því felst aukinn hvati í því að draga úr neyslu, endurvinna og endurnýta sem mest.

Samband íslenskra sveitarfélaga styður þétt við sveitarfélögin í landinu við undirbúning innleiðingar laganna og geta áhugasamir kynnt sér málið betur á síðu Sambandsins um verkefnið https://www.samband.is/verkefnin/umhverfis-og-urgangsmal/innleiding-hringrasarhagkerfis/

Verkefnið framundan er okkar allra, vinnum saman af framsækni með virðingu fyrir umhverfinu og samfélaginu sem við búum í.

Ásgerður K. Gylfadóttir, bæjarfulltrúi og formaður bæjarráðs.

Jöklasýning og önnur menning

Skráð af
ritstjorn
-
Kristján Guðnason

Frá því Gamlabúð var flutt aftur niður á hafnarsvæðið árið 2013 hefur Vatnajökulsþjóðgarður leigt húsnæðið af sveitarfélaginu, rekið þar upplýsingarmiðstöð, sýningu og skrifstofuaðstöðu starfsmanna. Starfsmönnum þjóðgarðsins á Höfn hefur fjölgað undanfarið og er von til þess að fjölgi enn frekar á næstu árum. Nú þegar er aðstaðan orðin of lítil og þarf því  að gera ráðstafanir til þess að taka á móti þeim störfum. 

Sveitarfélagið og Vatnajökulsþjóðgarður hafa skrifað undir viljayfirlýsingu um að byggja nýtt eða finna annað hentugt húsnæði sem  einnig gæti hýst jöklasýningu sem þjóðgarðurinn kæmi til með að sjá um í samstarfi við sveitarfélagið. Því auðvitað á jöklasýning hvergi annarstaðar heima en hér á okkar svæði og þar þarf að vanda til verka. 

Jöklasýningin þarf í senn að vera fræðandi og eftirtektaverð svo hún dragi að ferðafólk. Nú þegar hefur verið fundað um málið og er einhugur um að vinda sér í þetta verkefni. Við það að þjóðgarðurinn fari úr Gömlubúð opnast möguleikar á að sveitarfélagið setji upp veglega sýningu í húsinu t.d. um sögu Hafnar. Tíminn líður hratt svo skynsamlegt væri að fara undirbúa þá sýningu. 

Ég tel að gefa eigi  íbúum kost á að koma með sínar hugmyndir og væri ekki úr vegi að hafa íbúafund þar sem málið væri unnið áfram. 

Sýning í Gömlubúð myndi létta á Álaleirunni sem nú hýsir safnakostinn og þreytist ég seint á því að tala um að í Áleirunni eigi að vera opnar geymslur þar sem allir eiga að hafa aðgang þegar blessuð veiran gengur yfir. 

Svavarssafn

S.l. laugardag var stórkostleg sýning opnuð í Svavarssafni á verki Hlyns Pálmasonar; Harmljóð um hest.  Það er okkur hornfirðingum afar mikilsvert að eiga slíkan listamann og vonandi kemur hann til með að búa hér um ókomna tíð, og að svæðið fái að njóta hans einstöku hæfileika.

Sindrabær Menningarhús

Það þarf að klára endurbætur á Sindrabæ, og það þarf að gera það vel. Það er mín skoðun að það sé vel þess virði að taka samtalið um hvort Sindrabær geti ekki orðið Menningarhúsið okkar sem gæti hýst auk tónlistar bíósýningar, leiksýningar og fleira. Með viljann að vopni hef ég trú á að svo gæti orðið.

Örnefnaskilti

Nú á vormánuðum eigum við von á því að ný örnefna skilti verði sett niður við göngustígin á Höfn. Það er mikilvægt að örnefni glatist ekki og er þetta ein leiðin til að vekja athygli á þeim. Ungir og gamlir fái tækifæri til að glugga í skiltin sér til gagns og gamans.

Kristján S. Guðnason, bæjarfulltrúi og formaður atvinnu- og menningamálanefndar.

Ný líkamsræktaraðstaða og framkvæmdir við Hofgarð

Skráð af
ritstjorn
-

Líkamsrækt

Hönnunarvinna á nýrri líkamsræktarstöð hér á Höfn er langt á veg komin og var kynnt  hagsmunaaðilum á dögunum og hafði áður fengið kynningu í bæjarráði. Ef allt gengur að óskum gætu framkvæmdir við bygginguna hafist á vordögum og er góð von til þess. Eins og flestum er kunnugt verður líkamsræktarstöðin byggð áföst sundlauginni og verður á tveimur hæðum. Núverandi búningsklefar sundlaugarinnar koma til með að nýtast fyrir nýja líkamsræktarstöð en þó verða nýir útiklefar hluti byggingarinnar sem nýtast fyrir bæði sundlaug og líkamsrækt. Í byggingunni er gert ráð fyrir rýmum fyrir tengda starfsemi sem hægt verður að leigja út en það eru rými fyrir t.d. nuddara, sjúkraþjálfara, snyrtifræðinga o.f.frv. Auk þessa gera teikningar ráð fyrir bættri aðstöðu fyrir hreyfihamlaða og kynsegin fólk. Með tilkomu nýrrar líkamsræktarstöðvar kemur sveitarfélagið m.a. til með að losa um gjöld vegna leigu á núverandi húsnæði og verður byggingin þannig um leið virðisaukandi fyrir sveitarfélagið.

Í núverandi húsnæði líkamsræktarstöðvar við Álaugarveg 7 nýtast u.þ.b. 200 m² fyrir líkamsræktartæki og hópatíma. Samskonar rými í nýrri byggingu verður rúmlega 400 m² auk þess sem að gangar og stigahol geta nýst fyrir ýmsa líkamsrækt. Einnig koma stærri rými í nýrri líkamsræktarstöð til með að nýtast mun betur þar sem t.d. tækjasalurinn í núverandi líkamsræktarstöð þykir nýtast illa vegna lögunar hans. Samtals verður nýbyggingin um 670 m². Þær skoðanir hafa komið fram að byggingin sé ekki nægjanlega rúmgóð og sjálfsagt eru mismunandi skoðanir á því. Það verður ekki svo að allir þeir sem stunda líkamsrækt geti stundað hana á sama tíma í húsinu og það þarf að skipuleggja hópatíma og aðra skipulagða starfsemi í byggingunni vel til að nýta hana sem best. En staðreyndin er hins vegar sú að verið er að rúmlega tvöfalda það rými sem nýtist fyrir líkamsræktartæki og hópatíma ýmis konar. Og vert er einnig að taka það fram hér að verið er að vinna nýtt skipulag fyrir miðbæjarsvæðið sem mun gera ráð fyrir mögulegri stækkun á líkamsræktarstöðinni í framtíðinni. Nýtt húsnæði líkamsræktarstöðvar ætti því að vera mikil bylting fyrir notendur hvað húsakostinn varðar og vonandi heldur starfsemin áfram að blómstra í nýjum húsakynnum, hvernig svo sem henni verður háttað á nýjum stað.

Vert að geta þess að ný líkamsræktarstöð kemur til með að vera fyrsta umhverfisvottaða byggingin á Hornafirði, með svokallaða BREEM vottun, sem kemur m.a. fram í efnisvali, lýsingu, hljóðeinangrun og loftræsingu.

Að þessu öllu sögðu held ég að við getum horft með tilhlökkun fram vegin hvað varðar húsakost líkamsræktar í sveitarfélaginu og það fer að fækka afsökunum sem undirritaður hefur til þess að mæta ekki ekki ræktina!

Hofgarður

Framkvæmdir í Hofgarði voru boðnar út á dögunum. Skemmst er frá því að segja að bæjarráð samþykkti eina tilboðið sem barst í verkið sem hljóðaði upp á 58.515.748 kr. frá Þingvað ehf. og var tilboðið u.þ.b. 7% yfir kostnaðaráætlun. Og það er því mikil ánægja að segja frá því að framkvæmdir hefjast á næstu dögum og á þeim að vera lokið 8. ágúst n.k. Þessar framkvæmdir koma til með að stækka og bæta húsnæði og aðstöðu leikskólans Lambhaga til muna bæði fyrir börn og starfmenn hans. Auk þess verður, eftir framkvæmdirnar, innangengt á milli leikskólans og grunnskólans sem eru samreknir. Við það verður meiri og betri samnýting á starfsfólki skólanna. Á meðan á framkvæmdum stendur færist skólastarf í leik- og grunnskólanum í Hofgarði yfir í Efribæ á Fagurhólsmýri. Einnig koma framkvæmdirnar til með að bæta salernisaðstöðu grunnskólahluta hússins til muna en núverandi salerni eru upprunaleg eða frá árinu 1986 og því komin tími á endurbætur á þeim.

Björgvin Óskar Sigurjónsson, bæjarfulltrúi, varaformaður bæjarráðs og varaformaður fræðslu- og tómstundanefndar.

Stækkun Sjónarhóls

Skráð af
ritstjorn
-

Það eru tæp 4 ár síðan nýtt og endurbætt húsnæði Sjónarhóls var tekið í notkun. Í fyrra fór að bera á plássleysi og biðlistar að myndast. Óvænt staða verð ég að segja svo stuttu eftir miklar og þarfar breytingar, og ljóst að húsnæðið hefði þurft að vera stærra frá upphafi. En hvað sem því líður þá er staðan þessi og við urðum að hafa hraðar hendur og bregðast við og var opnun leikskóladeildar fyrir yngstu börnin í Selinu skammtímalausn sem talin var ákjósanlegust. Í mars verða hugsanlega 11 börn í Selinu.

Heildarfjöldi barna á Sjónarhóli í mars verður því um 128, og að mati starfsfólks rúmar skólinn mest 108 börn, ákjósanleg tala er á bilinu 102-108 börn. Áfram þurfum við að vinna hratt og ákveðið í að vinna að lausn til lengri tíma, eða næstu 10 – 15 ára. Í þeirri vinnu þarf fyrst og fremst að vanda til verka með samtali allra hlutaðeigandi. Það þarf líka að horfa til þess að samkvæmt húsnæðisáætlun má gera ráð fyrir um 150 börnum á leikskólaaldri eftir 10 ár. Það er að sjálfsögðu mjög jákvæð þróun ef sú spá gengur eftir. 

Biðlistavandinn – Hugsað í lausnum

Biðlistavandinn er enn til staðar og standa vonir til þess að við fáum áfram afnot af Selinu næsta skólaár, en þá fer stærri árgangur út en kemur inn. En það er ljóst að haustið 2023 þarf að vera búið að koma fyrir öðru húsnæði sem hýsir tvær deildir. Miðað við þær upplýsingar sem búið er að afla er útlit fyrir að fermetrafjöldinn þurfi að vera á bilinu 250 – 300 til að hýsa um 40 börn. Að koma fyrir 250 – 300 fm húsnæði á lóðina verður ekki einfalt mál en með góðri samvinnu þeirra sem málið varðar og fagaðila erum við staðráðin í að finna hentuga lausn.

Það þarf t.a.m. að taka tillit til praktískra atriða sem varða innra starf leikskólans, tengingu við núverandi húsnæði sem mun nýtast vel og taka minnsta plássið af leiksvæði nemendanna og jafnframt valda sem minnstri röskun á framkvæmdartíma. Hugmyndir frá arkitektum hafa verið skoðaðar og er verið að útfæra þrjár þeirra betur að ósk nefndarmanna í fræðslu- og tómstundarnefnd, umhverfis- og skipulagsnefnd og fulltrúa Sjónarhóls. Við viljum vanda til verka og sjá til þess að húsnæðið geti hýst 150 nemendur svo vel sé. Ef spá um aukinn barnafjölda gengur eftir þá  er kominn tími til að útbúa skipulag til framtíðar þar sem gert verður ráð fyrir nýrri leikskólabyggingu á nýjum stað.

Ég vil nýta tækifærið og þakka stjórnendum og öllu starfsfólki Sjónarhóls fyrir þolinmæði, dugnað og sveigjanleika sem þau hafa sýnt í stöðunni. Staðan er ekki ákjósanleg en að hafa jákvætt og lausnamiðað fólk með sér í þessari vinnu er gríðarlega mikilvægt.

Að auki, frístundastyrkur fyrir 5 ára

Á fundi fræðslu- og tómstundanefndar í desember sl. var farið yfir frístundastyrki í 26 sveitarfélögum fyrir árið 2021. Sú yfirferð sýndi að styrkur Sveitarfélagsins Hornafjarðar að upphæð kr. 50.000 er vel samanburðarhæfur og aðeins fimm Sveitarfélög af þessum 26 sem veita hærri styrk. Ákveðið var að bæta um betur og veita foreldrum 5 ára barna (miðað við árið) styrk að upphæð kr. 10.000. Við hvetjum foreldra 5-18 ára barna sem eru í skipulögðu íþrótta- og tómstundastarfi þar með talið tónlistarnámi við Tónskólann að nýta þessa búbót sem styrkurinn er.

Íris Heiður Jóhannsdóttir, varabæjarfulltrúi og formaður fræðslu- og tómstundanefndar.

Húsnæðismál

Skráð af
ritstjorn
-

Sveitarfélagið Hornafjörður er frábær staður að búa á. Hér höfum við aðgang að námi á öllum skólastigum, heilbrigðis- og félagsþjónusta er góð og aðgengileg. Aðstaða til fjölbreyttrar íþróttaiðkunar, verslun og þjónusta til staðar og öflugt menningarlíf a.m.k. þegar heimsfaraldur er ekki að herja á. Atvinna hefur verið nokkuð trygg og þrátt fyrir atvinnuleysi í dag, sem án efa tengist covid-19 heimsfaraldri er talað um skort á starfsfólki í ferðaþjónustuna sem er að fara á fulla ferð eftir erfiða tíma vegna covid.

Mikil uppbygging hefur verið í gangi síðustu ár í sveitarfélaginu. Það á bæði við í þéttbýlinu á Höfn og í dreifbýlinu, lóðaskortur hefur verið að myndast og er nú orðinn hamlandi þáttur. 

Í dag er íbúafjöldinn í sveitarfélaginu 2.444 þar af 1.788 á Höfn, Nes 242, Lón 25, Mýrar 61, Suðursveit 103 og Öræfi 225.

Húsnæðisáætlun

Bæjarstjórn Hornafjarðar afgreiddi í gær húsnæðisáætlun sveitarfélagsins en þar er dregin fram mynd húsnæðismála, innviðir sveitarfélagsins greindir og horft til framtíðar. En megin markmið með gerð húsnæðisáætlanna er að stuðla að auknu húsnæðisöryggi í sveitarfélaginu. Húsnæðisáætlunina má nálgast undir fundargerð bæjarstjórnar https://www.hornafjordur.is/stjornsysla/stjorn/fundargerdir/DisplayMeeting.aspx?id=XAblCsRrIkS6mOk7zqdmUA1&text= en hún verður einnig aðgengileg með öðrum húsnæðisáætlunum á vef Húsnæðis- og mannvirkjastofnunar sem hefur eftirlit með með uppfærlsu þeirra á landsvísu.

Höfn

Unnið hefur verið að þéttingu byggðar á Höfn en skipulagið „þétting byggðar – innbær „ mun fara í íbúakosningu vonandi í mars n.k. Einnig er í vinnslu deildiskipulag „Leirusvæði 2“ þar sem byggt verður á uppfyllingunni austan við Álaleiru og Hagaleiru. 

Unnið er að undirbúningi fleiri íbúðasvæða m.a. á grunni íbúafundar um málið sem haldinn var sl. haust. Margar góðar hugmyndir komu fram bæði um ný svæði og frekari þéttingu byggðar. 

Hrolllaugsstaðir

Nú styttist í að fimm íbúðir verði klárar í gamla skólahúsnæðinu á Hrollaugsstöðum en þær fara allar í útleigu. Á bæjarstjórnarfundi í gær 10.febrúar var bæði aðal- og deiliskipulag við Hrollaugsstaði afgreitt til Skipulagsstofnunar en þar er fyrirhuguð frekari íbúabyggð.

Öræfi

Mikil uppbygging er við Borgartún, ofan við Hofgarð og styttist í að það svæði verði fullbyggt miða við núverandi skipulag. En fólksfjölgun hefur verið mikil í Öræfum síðustu ár, enda má segja að Öræfin séu vagga ferðaþjónustunnar í sveitarfélaginu og stutt í einstakar náttúruperlur.

Það er ljóst að mikið er framundan í skipulagsmálum tengdum íbúabyggð en með flutningi Skipulagsstofunar til hins nýja innviðaráðuneytis sem fer nú bæði með húsnæðis- og skipulagsmál stendur til að huga að einföldun og skilvirkari afgreiðslu skipulagsmála sem mun vonandi koma sveitarfélögum vel sem eru í sambærilegri stöðu og Sveitarfélagið Hornafjörður.

Ásgerður K. Gylfadóttir, formaður bæjarráðs.

Vegur til framtíðar

Skráð af
ritstjorn
-

Bættar samgöngur eru baráttumál hverra samfélaga, það má með sanni segja að góðar samgöngur séu lífæð landsbyggðarinnar. Traust vegakerfi og góðar samgöngur eru forsenda þess að mannlíf og atvinnulíf geti vaxið og dafnað í þéttbýli sem dreifbýli. Gott vegakerfi leiðir einnig af sér tímasparnað og eitt það mikilvægasta, minni slys. En álag á vegum landsins hefur aukist mikið á undanförnum árum meðal annars vegna fjölgunar ferðamanna. Allir sem hafa keyrt um suðurlandi austur á Höfn hafa orðið varir við aukna umferð og krafa hefur verið uppi um að bæta þurfi vegakerfið.

Því er gleðilegt að segja frá því að fljótavegur austur á Höfn í Hornafirði verður fljótlega að veruleika. Hér er um að ræða langþráða vegaframkvæmd sem mun bæta umferðaröryggi og stytta ferðatíma sem um munar. Fljótavegur er svo sannarlega á áætlun og komin í útboðsferli. Gert er ráð fyrir að nú í upphafi febrúarmánaðar komi fram lokatilboð í verkið og skrifað verði undir samninga í sama mánuði. 

Ný brú yfir Hornafjarðarfljót mun stytta hringveginn um 12 kílómetra þvert yfir Hornafjörð. Um er að ræða fyrsta verkefnið af sex sem samþykkt voru í lögum um samvinnuverkefni um samgönguframkvæmdir. Miðað er við að framkvæmdir hefjist á næsta ári og þær taki þrjú til þrjú og hálft ár. 

Það er ánægjulegt að sjá góðar hugmyndir verða að veruleika, sérstaklega hugmyndir sem þessar sem koma til með að bæta samfélagið. 3 ár eru stuttur tími, framtíðin er handan við hornið. 

Hafdís Hrönn Hafsteinsdóttir, 7. þingmaður Suðurkjördæmis, Framsóknarflokki.

1...456...14Síða 5 af 14
© Framsóknarfélag Austur-Skaftafellssýslu