Fyrstu húsin á Höfn voru reist við Hafnarvík árið 1897. Þau standa enn. Gamlabúð hýsir Vatnajökulsþjóðgarð, Kaupmanshúsið og síðar Kaupfélagshúsið geymir hið góða veitingahús Ottó og hús Guðmundar söðlasmiðs stendur enn efst á Afkasthól þar sem gatan Bogaslóð liggur um.
Innsigling
Hin gjöfulu fiskimið fyrir utan Hornafjörð er ástæða fyrir þéttbýlinu sem tók að myndast fyrir meira en öld síðan. Ósinn hefur hins vegar verið ein stærsta ástæða þess að Höfn var ekki enn stærri verstöð en raunin er. Lengi hefur verið barist fyrir því að lagt verði fé í rannsóknir, hönnun og framkvæmdir við bætta innsiglingu um Ósinn.
Varnargarður sem nú er unnið að í Einholtskletta mun hjálpa til við að stöðva sandburð inn í Ósinn og minnka þannig líkur á að að skip taki niður um leið sinni um Grynnslin. Verkinu á að ljúka í september.
Þetta er fyrsta skrefið af mörgum í að búa til betri og öruggari innsiglingu. Með þessu skapast mikil tækifæri í sjávarútvegi með möguleika á komum stærri frakt- og fiskiskipa. Skemtiferðaskip sem núna komast ekki inn um Ósinn myndu örugglega glöð vilja leggjast að bryggju í Ríki Vatnajökuls.
Í útvarpinu les Ármann Jakobsson hina mögnuðu Brennu-Njáls sögu. Samhliða eru vikuleg viðtöl við Ármann í Víðsjá á Rás 1 þar sem hann greinir söguna og skýrir. Það má hiklaust mæla með að hlusta á þetta allt. Auðvelt er að nálgast þetta á RÚV sarpinum eða í RÚV appinu. Lestur Ármanns er mjög góður og skemmtilegur.
Helsta sögusvið Njálu eru Rangárvellir, Fljótshlíð og Landeyjar. En hún kemur víðar við bæði innanlands og erlendis. Hornafjörður er nefndur nokkrum sinnum, meðal annars í tengslum við utanferð Flosa eftir brennuna.
Örnefni hér benda enda til þess að til forna hafi verið höfn í Hornafirði. Festarklettar, Leiðarhöfði og sjálf Höfn benda í þessa átt. Í sögunni eru nefnd bæjarnöfn sem ennþá þekkjast eins og Stafafell og Bjarnanes en líka eru örnefni sem ekki finnast í dag. Ber þá helst að nefna Breiðá í Fellshverfi þar sem Kári bjó eftir sættir við Flosa. Kári hefur ekki verið setur á neitt kotbýli og þarna hefur því verið blómleg byggð á þeim tíma sem sagan gerist, um árið 1000. Núna ræður Breiðamerkurjökull þar ríkjum.
Það er vitað að við landnám var veðurfar mun hlýrra en síðar varð á Íslandi. Þess vegna voru jöklar minni og skriðjöklar sem við sjáum í dag ekki allir til. Það er gaman að ímynda sér hvernig umhorfs var á þessum tíma.
Íslendingar eru hvattir til að ferðast innanlands. Landið hefur margt upp á bjóða, bæði sögustaði og náttúruperlur. Það verður ekki mikið þjóðlegra en að spyrða saman hlustun á Brennu Njáls sögu og ferðalög um sveitir og bæi innanlands.
Það var stór stund í Svavarssafni í morgun þegar félags- og barnamálaráðherra Ásmundur Einar Daðason, Matthildur Ásmundardóttir bæjarstjóri og Birna Þórarinsdóttir framkvæmdastjóri UNICEF á Íslandi skrifuðu undir samkomulag um samstarf við framkvæmd verkefnisins barnvæn sveitarfélög. Verkefnið felst í því að sveitarfélagið innleiði Barnasáttmála Sameinuðu þjóðanna samkvæmt hugmyndafræði barnvænna sveitarfélaga sem UNICEF hefur þróað. Verkefnið er stutt með reglulegum og vel tilgreindum stuðningi félags- og barnamálaráðuneytisins og UNICEF með fræðslu og ráðgjöf.
Með undirskriftinni er staðfest samþykki sveitarfélagsins, að nota Barnasáttmálann sem viðmið og leiðarstef í starfsemi þess. Verkefnið hefst nú á tveggja ára innleiðingarferli. Að þeim tíma loknum getur sveitarfélagið, að uppfylltum forsendum verkefnisins, hlotið viðurkenningu frá UNICEF sem barnvænt sveitarfélag.
Í tilefni undirskriftarinnar skelltu ráðherra, bæjarstjóri og framkvæmdastjóri UNICEF sér á hoppubelginn góða með börnunum og nutu gleði dagsins í góða veðrinu.
Regnbogastígurinn
Regnbogastígurinn var svo málaður í kjölfarið. Margir lögðu þar hönd á plóg við að fegra umhverfið og fagna í leiðinni fjölbreytileikanum í samfélagi okkar í Sveitarfélaginu Hornafirði.
Það var ánægjulegt að félags- og barnamálaráðherra tók þátt í því verkefni með okkur.
Kvennréttindadagurinn
Að lokum langar mig að óska okkur öllum til hamingju með daginn! 19. júní, Kvennréttindadagurinn, er hátíðis- og baráttudagur kvenna á Íslandi þar sem við höldum uppá kosningarétt kvenna. Hann fengu konur þann 19. júní 1915, 40 ára og eldri.
Njótum dagsins, þökkum þeim sem hafa gengið hafa veginn á undan okkur og höldum baráttu fyrir réttindum einstaklingsins áfram!
Okkar góðu nágrannar í Skaftárhreppi fögnuðu stórum áfanga í vikunni þegar skóflustunga var tekin að nýrri gestastofu Vatnajökulsþjóðgarðs við Kirkjubæjarklaustur. Þetta er gott skref fyrir þjóðgarðinn og íbúa í Skaftárhreppi. Meginstöðvar þjóðgarðsins áttu að vera í byggð og mynda einskonar hlið í þjóðgarðinn. Tvær þeirra eru í Sveitarfélaginu Hornafirði. Önnur í hjarta Vatnajökulsþjóðgarðs í Skaftafelli og hin á Höfn. Aðrar slíkar stöðvar eru nú þegar á Skriðuklaustri og Ásbyrgi. Á milli átti að byggja upp starfstöðvar nærri útivistarsvæðum sem leggja áttu grunn að aukinni útivist og atvinnusköpun.
Jökulsárlón
Fyrir nokkrum árum var mörkuð sú stefna að við Jökulsárlón ætti ekki að byggja upp aðstöðu til næturdvalar. Helga ætti svæðið daggestum. Sjónarmið voru uppi um að þarna væri kjörið tækifæri til að byggja upp lúxusgistingu en því var hafnað þá. Allir ættu að geta notið þess að eyða dagsparti við lónið á sínum eigin vegum, til að njóta þjónustu fyrirtækja sem ýmist gerðu út á lónið sjálft, náttúruperlur í nágrenni eða þiggja veitingar sem þar væru í boði.
Það er enn stórt
álitamál hvernig þjónustu eigi að byggja upp við lónið og á kostnað hvers,
ríkisins eða þeirra sem ætla að þjónusta gesti þar. Sennilega þarf blöndu af hvoru tveggja. Mikilvægast er að sem flestir komist að og tækifæri
sé fyrir einstaklinga að bjóða fram þjónustu sem gestirnir leitast eftir í
formi veitinga og afþreyingar. Það þarf
ekki stóra þjónustumiðstöð þar sem einn aðili heldur í taumana, hvort sem það
er einkafyrirtæki eða ríkið. Frekar ætti
að stefna að uppbyggingu í anda mathalla sem sprottið hafa upp víða um heiminn,
með mörgun litlum veitingastöðum innan sömu veggja og aðstöðu utandyra þar sem
mörg afþreyingarfyrirtæki geta þrifist
Höfn
Gamlabúð hefur verið meginstarfstöð Vatnajökulsþjóðgarðs um nokkurt skeið og þjónað því hlutverki vel sem og öðrum sem það merka mannvirki hefur gegnt í gegnum tíðina. Það má draga fram að rétt yfir þúsund gestir sóttu hana heim áður en hún var flutt á sinn gamla stað fyrir um áratug og var á leiðinni að vera ein og yfirgefinn. Nú eru gestirnir taldir í tugum þúsunda. Til lengdar á Gamlabúð samt að þjóna öðru hlutverki og Vatnajökulsþjóðgarður að byggja upp gestatofu álíka þeirri sem nú ris á Kirkjubæjarklaustri.
Uppbygging innviða
Þrátt fyrir að stórar gestastofur í byggð geti þjónað þjóðgarðinum, gestum hans og byggðinni þar sem húsið rís þá er mikilvægast að byggja upp innviði fyrir útivist og atvinnusköpun við þær náttúruperlur sem þjóðgarðurinn sjálfur gæti aldrei þrifist án. Bátur leggst ekki að landi með afla án hafna og eins verður ferðaþjónusta án grunngerðar ekki að veruleika. Göngustígar, brýr, fræðsluskilti, sómasamlegar götur fyrir þá faraskjóta sem fólk velur ásamt lögum og reglum eru þær bryggjur sem þarf að byggja til að efla ferðaþjónustu við jaðar Vatnajökulsþjóðgarðs.
Sjávarútvegur hefur verið undirstöðu atvinnugrein okkar Íslendinga í aldaraðir og ein helsta ástæða að efnahagur landsins sé sambærilegur við það sem best gerist á jörðinni.
Á tímum sem þessum
heldur fólk sig heima, ferðast lítið sem ekkert og sækir ekki veitingastaði. Þegar nær allir veitingastaðir í veröldinni
hafa verið lokaðir nú á annan mánuð þá er mikilvægt fyrir íslensk
sjávarútvegsfyrirtæki að hafa góð viðskiptatengsl við verslunarkeðjur erlendis. Faraldurinn hefur undirstrikað hversu
mikilvæg er að hafa eggin ekki öll í sömu körfunni. Fyrir lönd eins og Ísland er ekki gott að
reiða sig á eina atvinnugrein umfram aðra og fyrirtæki sem starfa á erlendum mörkuðum,
líkt og flest sjávarútvegsfyrirtæki gera, ættu að herja bæði á verslunarkeðjur
og veitingahús.
Sjómanndagurinn verður ekki með hefðbundnu sniði þetta árið. Kappróður, sigling út fyrir Ós og skemmtun í íþróttahúsinu hafa verið fastir liðir í tilverunni en núna hittist fólk í smærri hópum og gerir sér glaðan dag. Í tvö ár hefur ekki verið gefinn út loðnukvóti og humarkvóti hefur dregist mikið saman. Á móti er þorskstofninn sterkur. Kjör sjómanna hafa því oft verið betri en engin stétt er sennilega jafn vön sveiflum í kjörum sínum og sjómenn.
Hornafjörður er
útgerðarbær og í gegnum faraldurinn var ekki dregið úr sókn né vinnslu. Búið er að fjárfesta á undanförnum árum og því
hægt að uppfylla kröfur á kröfuhörðum mörkuðum úti um allan heim. Þrátt fyrir tæknivæðingu þá er ekkert sem
kemur í stað fyrir þrautsegju og útsjónarsemi þeirra sem standa í eldlínunni.
Við óskum sjómönnum
og fjölskyldum þeirra til hamingju með daginn.
Forvarnir eru langtímaverkefni og tengist heilsu okkar á margan hátt, bæði líkamlegri og andlegri heilsu. Stundum er hugtakinu fleygt fram í tengslum við neyslu unglinga og þar er mikil þörf á fræðslu og uppbyggilegu starfi til að hvetja ungt fólk áfram á réttri braut. Forvarnir snerta samt okkur öll og þegar komið er fram á fullorðins ár er mikilvægt að brýna fyrir öllum reglubundna hreyfingu, gott mataræði og fleira til að heilsa sé góð.
Hlutverk
sveitarfélaga
Sveitarfélögin
eru til þess að þjóna íbúum í sínu héraði. Markmið með því að halda úti
sveitarfélögum er einmitt að halda þjónustunni sem næst einstaklingum og að
allir geti haft mótandi áhrif á hvernig stefnan er á hverjum tíma.
Sveitarfélög eru þess vegna mjög vel í stakk búinn til að vinna markvisst að
fræðslu og forvörnum til bættrar lýðheilsu. Hornafjörður vinnur á
margvíslegum vígstöðum að þessu, í skólum, á vettvangi heilbrigðisstofnunnar og
í gegnum samning sinn við íþróttafélög.
Verum á tánum
Það er hægt að
gera betur og þar sem samfélagið er í örri þróun þarf sífellt að vera þróa
nýjar leiðir og aðferðir til að koma skilaboðum áleiðs. Gott væri að ná
að tvinna betur starf skóla, íþróttafélaga og heilbrigðisstofnunnar í þessa
veru. Skoða mætti hvort ekki ætti að fela starfsmanni sem til dæmis gæti
verið undir hatti grunnskólans að vinna með markvissari hætti að þessum
málum. Það hefur sýnt sig að sterk tengsl eru milli heilbrigðis lífernis
og árangurs í námi barna.
Á Hornafirði er
allt til staðar til að ná árangri í þessum efnum en við þurfum alltaf að vera á
tánum, ekki bara þegar halla fer undan fæti heldur einmitt að viðhalda árangri
þegar hann næst.
Til hamingju með áfangann, stúdentar og aðrir sem útskrifast í dag úr námi frá Framhaldsskólanum í Austurskaftafellssýslu!
Skólalok eru
alltaf tímamót og ekki síst þegar ákveðnum áfanga er náð. Vinna vetursins gerð
upp. Vonandi er uppskera eininga og áfanga góð hjá nemendum þetta vorið en
segja má að vorönnin hafi verið eftirminnileg og án efa verið mörgum erfið.
Heimsfaraldur kórónaveiru setti skólastarf úr skorðum á öllum skólastigum en bæði nemendur og kennarar stóðu sig vel í þessum einkennilegu aðstæðum og gerðu það besta úr fordæmalausum aðstæðum. Eiga þau hrós skilið fyrir það.
Atvinna fyrir ungmenni
Nemendurnir sem nú útskrifast eða fara í sumarfrí frá FAS, öðrum framhaldsskólum og háskólum eru að upplifa fleiri breytingar. Mörg hver hafa þau átt vísa vinnu við hin ýmsu störf yfir sumartímann og ekki síst í ferðaþjónustu. Hinar ýmsu greinar ferðaþjónustunnar hafa tekið þeim höndum tveim og krakkarnir hafa getað aflað sér tekna til að undirbúa næsta vetur og gera sér glaðan dag yfir sumarið.
Nú er staðan önnur. Atvinnuleysi á þeim skala sem við höfum ekki upplifað hér áður og óvissa um hve lengi ástandið varir. Námsmenn eiga ekki rétt á atvinnuleysisbótum og þyngist róðurinn hjá nemendum, foreldrum og forráðamönnum ef ekki koma inn tekjur yfir sumarið.
Aðrar atvinnugreinar koma nú sterkar inn þar sem hægt er að útvega krökkunum vinnu. Sveitarfélagið, fiskvinnsla, iðnaðargreinarnar, sjoppur, Nettó o.fl.
Átak hjá sveitarfélaginu
Sveitarfélagið hefur ákveðið að bæta við þann hóp sem hefur að jafnaði verið í sumarvinnu, vinnuhópar verða á Höfn og í Öræfum. Auk hins hefðbundna Vinnuskóla og bæjarvinnu hafa forstöðumenn sviða sveitarfélagsins tekið saman verkefni af ýmsum toga sem nemendur á framhalds- og háskólastigi munu sinna. Auk þess hafa Nýheimar og Rannsóknasetur Háskóla Íslands einnig auglýst eftir nemendum til starfa í sumar.
Hluti þessara
starfa eru styrkt með fjárframlagi frá Vinnumálastofnun og einnig hefur verið
sótt um styrki til Nýsköpunarsjóðs námsmanna.
Markmiðið er að allir nemendur fái verkefni í sumar og tekjur sem geta skipt sköpum sérstaklega fyrir eldri námsmenn.
Á síðasta fundi umhverfis- og skipulagsnefndar var Hafnarbrautin til umræðu eða öllu heldur útendi hennar, þ.e.s. frá Ráðhúsi og að gatnamótunum við hafnarvogina. Eins og við verðum öll vör við er þessi hluti göturnnar varla fær fuglinum fljúgandi hvað þá gangandi og akandi umferð. Það hefur verið unnið að endurhönnun götunnar nú í talsverðan tíma. Fyrst þurfti að mæla götuna upp og síðan ákveða gróft útlit þ.e. hversu breið gatan ætti að vera eða gæti verið og þá gangstéttir einnig.
Bókun Umhverfis- og skipulagsnefndar
varðandi málið:
Umhverfis-
og skipulagsnefnd leggur til að í samræmi við umræður á fundinum og þær
upplýsingar sem nú liggja fyrir verði hönnunin unnin með þversnið 4 í samræmi
við markmið um að lækka umferðarhraða og auka öryggi gangandi vegfarenda á
svæðinu og hvetja til hjólreiða. Lagt verði upp með að gatan verði einhalla og
að útlit verð samræmt eins og kostur er við núverandi götumynd og þann hluta
Hafnarbrautar sem þegar hefur verið endurbættur.
Þetta er sú útfærsla sem varð fyrir valinu (þversnið 4)
Eins
og sést á myndinni höfum við úr um 12,5m að spila og komu fram nokkrar
hugmyndir um hvernig þeim væri best varið fyrir umferð gangandi, hjólandi og
akandi umferð. Leituðust nefndarmenn við að hafa umferðaröryggi og
umhverfissjónarmið að leiðarljósi.
Fyrst voru menn á því að þessi útfærsla væri sú besta.
En
eftir talsverðar vangaveltur og góðan rökstuðning samþykktu nefndarmenn að
þetta væri ekki góður kostur þar sem allar breiddir eru í lámarki og það væri
mikill kostnaður fólgin í því að skilja hjólaleiðina frá akreininni ef vel ætti
að vera. Einnig er þessi leið óhentug þar sem við hefðum þurft að vera með
götuna tvíhallandi og því hefði líka fylgt talsverður aukakostnaður. Ef við
hefðum látið dug að mála hjólareinina frá akreininni sem vissulega er sjónarmið
þá hafa allar rannsóknir sýnt að bílstjórar fá það á tilfinninguna þegar engin
hjólamaður er sjáanlegur að gatan sé breið og bíður það þá upp á hraðakstur.
Með
þversiði 4 (efri mynd) þá er leitast við að fara bil beggja og einnig að hafa fyrri
lagfæringar sem farið hafa fram á Hafnarbrautinni til hliðsjónar.
Næstu skref
Nú
bíður nefndin eftir hugmyndum að endanlegu útliti og þeim möguleikum af
yfirborði sem til greina koma (malbik, steypa eða hellur). Einnig eigum við von
á kostnaðartölum, þó vissuleg kostnaðurinn skipti máli þá held ég að Hornfirðingar
vilji hafa aðalgötuna fallega, snyrtilega og hlýlega. Götu sem tekur vel á móti
gestum. Á næsta fundi getum við vonandi ákveðið það sem uppá vantar svo hægt
verði að útbúa útboðsgögn. Þá á eftir að ákveða endanlega staðsetningu
gangbrauta. Síðan en ekki síst eru það gatnamótin sem tengja götuna við
hafnarsvæðið. Þar er mikil umferð bæði af bílum og gangandi vegfarendum, þar er
mikilvægt að vel takist til.
Það
er stefna okkar að bjóða framkvæmdina út í lok sumars og að henni verði lokið
næsta vor þegar ferðamenn fara að streyma til okkar á nýjan leik.
Nú mega börn æfa íþróttir eins og áður var. Þrátt fyrir hömlur síðustu vikur mega Íslendingar teljast heppnir samanborið við margar aðrar þjóðir sem búið hafa við strangt útgöngubann. Þannig hafa börn víða ekki mátt leika sér úti, hvað þá að safnast saman og stunda íþróttir.
Mótum og leikjum í íþróttum sem keppt er yfir vetrarmánuðina hefur að mestu leiti verið blásið af. KSÍ birti nýlega leikjaniðurröðun fyrir leiki yngri- og meistaraflokka. Leikirnir í sumar verða fleiri en 100 í öllum flokkum og þá eru ekki meðtalinn mót eins og Reycup, mótin í Eyjum og á Akureyri. Leikið verður út október til að klára öll mót. Sindramenn verða því á ferð og flugi á næstu mánuðum.
Samningur við Sindra
Sveitarfélagið styður við íþróttalíf á virkan hátt. Gengið var frá nýjum samningi á síðasta ári. Sveitarfélagið styður sérstaklega við rekstur skrifstofu Sindra, en veitir bæði peningum í yngri flokka félagsins sérstaklega, sem og afreksstarf. Þá fær Sindri framlög til að halda úti íþrótta- og tómstundaskóla og standa að 17. júní hátíð á Höfn.
Meginmarkmið samningsins er:
að bjóða upp á fjölbreytt starf þannig að sem flestir fái tækifæri til þátttöku í samræmi við áhuga, vilja og getu, óháð efnahag, búsetu, kyni, kynþætti eða að öðru leiti.
að auka gæði og fjölga þátttakendum í hreyfingu og almennri heilsueflingu.
að vinna markvisst að jafnrétti m.a. með því að tryggja iðkendum af öllum kynjum jöfn tækifæri til að stunda íþróttir
að ná árangri í forvörnum varðandi notkun tóbaks og vímuefna, einelti og brottfalli úr íþróttum.
Auk þess veitir sveitarfélagið stuðning í formi íþrótta- og tómstundastyrks. Upphæðin er 50.000 á hvert barn sem nýta fyrir íþrótta-, lista- og/eða aðra tómstundastarfsemi sem samþykkt hefur verið af sveitarfélaginu.
Góð aðstaðasem má bæta
Almennt má segja að aðstaðan til iðkunar sé góð. Íþróttavellir, bæði keppnis- og æfingavellir fyrir fótbolta og frjálsar íþróttir eru til fyrirmyndar. Þá er Báran frábært æfingahúsnæði sem nýta má í leiki fyrir yngstu flokkana. Sama má segja um sundlaugina sem er afar góð fyrir almenning sem og íþróttafólk. íþróttahúsið er hins vegar komið til ára sinna og getur ekki til lengri tíma þjónað þeim krafti sem er í starfsemi körfuboltans og blakið er einnig vaxandi.
Nýtt íþróttahús hýtur því að vera næsta stóra framkvæmd á vegum sveitarfélagsins.
Kórónufaraldurinn hefur sett atvinnulífið í uppnám en sveitarfélagið er fjárhagslega sterkt og vel í stakk búið til að ráðast í miklar framkvæmdir til að örva atvinnu í héraðinu. Munum líka að þetta er tímabundið ástand. Svæðið hefur mikla sérstöðu og verður áfram sterkur segull fyrir ferðamenn þegar fram líða stundir.
Það eru þrátt fyrir allt talsverð umsvif í samfélaginu. Ekki ber á öðru en að verkefni séu góð hjá iðnaðarmönnum. Einstaklingar byggja hús sem aldrei fyrr og í smíðum eru brýr í Suðursveit sem heimaverktakar koma að.
Framkvæmdir á vegum sveitarfélagsins.
Í ár er gert ráð fyrir að sveitarfélagið framkvæmi fyrir nálægt 800
miljónir og litlu minna árið 2021. Á fjögura ára tímabili verða framkvæmdir
meira en 2 miljarðar króna. Fjárhagurinn leyfir þessar framkvæmdir.
Árið 2019 skilaði sveitarfélagið 468 miljón króna hagnaði og skuldirnar eru
litlar.
Helstu framkvæmdir í ár eru upphaf á byggingu nýs hjúkrunarheimilis sem ljúka á árið 2022, breyta á húsnæði gamla Krakkakots fyrir málefni fatlaðs fólks, Mikilgarður fær 40 miljónir og síðan 20 miljónir á hverju ári til 2023 og endurbætur á Vöruhúsi halda áfram. Þá verður fjármagn lagt til endurbóta á Sindrabæ sem halda áfram næstu 2 árin. Hafist verður handa við endurbætur á Hafnarbraut sem lýkur á næsta ári.
Sjávarútvegurinn burðarás
Loðnubrestur annað árið í röð hjálpar ekki til í stöðunni og humarkvóti hefur dregist mikið saman. Þrátt fyrir það stendur sjávarútvegur sterkt á staðnum. Fjárfestingar í nýjum skipum og vinnslulínum gera það kleift að hægt er að sækja á fjölbreytta markaði um allan heim. Þrátt fyrir að veitingahús séu víðast hvar lokuð í heiminum er mikið verslað í stórkmörkuðum. Með fjölbreyttri vinnslu er hægt að bregðast við slíkum sveiflum.
Öll él birta upp um síðir
Ríki og sveitarfélög þurfa að gera það sem í þeirra valdi stendur til að verja störf og afkomu heimila og fyrirtækja. Nú þegar hefur ríkið sett fram aðgerðapakka og von er á fleirum. Öll él birta upp um síðir en mikilvægast nú er að hlúa að þeim sem minnst mega sín í þessu ástandi.
Kristján S. Guðnason, formaður atvinnu- og menningarmálanefndar
