Vettvangur dagsins

Skráð af
ritstjorn
-

Bæjarstjórn Hornafjarðar kom saman í gær fimmtudaginn 20. ágúst eftir sumarfrí. Fundurinn var að vanda sendur út í beinni útsendingu á YouTube í gegnum Facebook síðu sveitarfélgsins. Sjá hér https://www.youtube.com/watch?v=QtJbonM1Ouw&feature=youtu.be&fbclid=IwAR2IdhLtHOUSvos7xi_8ZYVCF0GFyzqk_NMel4ABMzhLHAp1K7we5Owk3x8

Fundur með ráðherrum

S.l. þriðjudag sat undirrituð fund með ríkisstjórninni og fulltrúum sveitarfélaga á Suðurlandi á Hótel Læk í Rangárþingi ytra. Þar var farið vel yfir áskoranir sveitarfélaganna á þessum skrítnu tímum. Áhrif Covid-19 á atvinnulíf á svæðinu og tekjur sveitarfélaga. Einnig þær áskoranir sem við stöndum frammi fyrir við gerð fjárhagsáætlanna fyrir næsta ár. Hvernig við getum haldið uppi framkvæmdastigi og þjónustu þrátt fyrir að tekjur sveitarfélaganna dragist saman. Farið var yfir hvernig fundarmenn telja að viðspyrnuaðgerðir ríkisins hafi nýtst til þessa og hvar þarf að bæta í. 

Þar gafst einnig tækifæri til að minna á þau verkefni sem þarf að leysa á milli ríkis og sveitarfélags s.s. hvernig rekstri hjúkrunar- og dvalarheimila verður háttað til framtíðar og aukið fjarmagn til reksturs. Hvar bæta þarf í opinbera þjónustu og mikilvægi þess að dreifa opinberum störfum meira út á land með fjarvinnslu sem hefur sýnt sig að er vel framkvæmanleg.

Fram kom að ríkið veitir sex sveitarfélögum stuðning vegna hruns í ferðaþjónustu í kjölfar Covid-19. Sveitarfélagið Hornafjörður er eitt þessara sveitarfélaga og fær 18 milljónir í sinn hlut. Nú verður unnið úr því hvernig þessir fjármunir nýtast best.

Nýjar reglur

Í vikunni tóku gildi nýjar reglur um sóttvarnir hjá öllum þeim sem koma til landsins. Íþyngjandi reglur fyrir ferðamenn en sjálfsögð varúðarráðstöfun fyrir þá sem eru að koma „heim“ eða eru að koma til langrar dvalar á landinu. 

Sitt sýnist hverjum um þessar aðgerðir. Það er erfitt og jafnvel ill mögulegt að finna meðalveginn sem ver okkur gegn heimsfaraldrinum og heldur efnahagslífinu gangandi.

Fjarlægðarreglan hefur einnig verið mikið í umfjöllun í vikunni. Túlkun, viðurlög og virðing gagnvart náunganum. Hvað má hvað má ekki? Við erum örugglega flest að velta því fyrir okkur og reyna okkar besta.

Skólar hefjast

Skólarnir eru að byrja. Þar er aðlögun að reglunni niður í 1 meter sem auðveldar mikið skipulagningu skólastarfs. Það verður næstum því „eðlilegt“ hjá litlum skólum eins og í okkar samfélagi sem er frábært!

Það eru krefjandi tímar framundan fyrir okkur öll. Stöndum saman í því að vernda okkur íbúa og samfélagið okkar. Viðhalda virkni og þátttöku í verkefnum samfélagsins eftir því sem við best getum. 

Ásgerður K. Gylfadóttir, formaður bæjarráðs

Íbúar með erlent ríkisfang

Skráð af
ritstjorn
-

Undanfarin ár hefur íbúum með erlent ríkisfang fjölgað mikið.  Nýlega tók Hildur Ýr Ómarsdóttir, verkefnisstjóri fjölmenningar, saman upplýsingar um málefni erlendra íbúa í Sveitarfélaginu Hornafirði sem kynnt var í félagsmálanefnd.  Í samantektinni kemur fram að 545 einstaklingar með erlent ríkisfang eru með lögheimili í sveitarfélaginu.  Þetta er fjölbreyttur hópur af 39 þjóðernum.  Stæsti hópurinn er frá Pólanndi en Króatar, Tékkar og Rúmenar eru líka fjölmennir.  Starfsemi sveitarfélagsins í málefnum nýrra íbúa hefur vaxið mikið enda þörfin brýn eins og sjá má á tölunum.  Það má ekki heldur gleyma þeim íbúum sem eru af erlendu bergi brotnu en eru með íslenskt ríkisfang. 

Fjölmenningarmál á mörgum vígstöðum

Sveitarfélagið kappkostar að taka vel á móti fólki og auðvelda aðlögun þess að samfélaginu okkar.  Á vegum sveitarfélagsins er unnið að margvíslegu starfi og á árinu 2019 var til dæmis móðurmálskennsla á pólsku í Grunnskólanum, bókasafnið bjó til kassa af barnabókjum á ýmsum tungumálum, aðstoð var veitt við heimanám og búin til umgjörð utan um móttökusamtöl svo fátt eitt sé nefnt.  Á yfirstandi ári hafa bæst við námskeið fyrir túlka, íslenskuþjálfun á heimili og bókasafni og íslenska á vinnustað.   Daglega er unnið við ýmisskonar aðstoð og ráðgjöf vegna dvalarleyfisumsókna, ráðgjöf varðandi mannréttindi og félagsleg réttindi, ýmiskonar aðstoð við skráningar og umsóknir, ráðgjafar varðandi réttindi og skyldur í íslensku samfélaginu og fleira mætti nefna. 

Áskorun framundan

Í águst 2020 voru 71 einstaklingur á atvinnuleysisskrá í sveitarfélaginu og þar af voru 65% erlendir ríkisborgarar.  Á undanförnum árum hefur erlent vinnuafl haldið mörgum vinnustöðum gangandi þegar innlent vinnuafl hefur skort.   Núverandi ástand verður vonandi skammvinnt og þá þurfum við aftur á þessum hópi fólks að halda í atvinnulífinu.  Við skulum því hlúa að þeim áfram. 

Á tímum alþjóðavæðingar og aukins flæði fólks á milli landa mun samfélag okkar blandast meira en áður.  Því fylgja margvíslegar áskoranir og við þurfum að virkja nýbúana okkar til þáttöku í samfélaginu, hjálpa þeim að fóta sig í nýjum veruleika og hlúa vel að fjölskyldum.  Það er því mikilvægt að halda úti öflugu starfi í fjölmenningarmálum.  Eins og staðan er hálft stöðugildi í málaflokknum í stjórnsýslu sveitarfélagsins.  Unnið er markvisst af þessum málum í Grunnskólanum og bókasafnið hefur sinnt þessum málum í auknum mæli.  Við verðum hins vegar að velta því alvarlega fyrir okkur hvort ekki rétt að hafa 100% starf í ráðhúsinu í ljósi aukins þunga og mikilvægi málaflokksins.  Við er líka ríkara og öflugra samfélag með þessari inngjöf.

Kynningarátak fyrir ferðaþjónustun

Skráð af
ritstjorn
-

Áhugaverður kynningarfundur var haldinn fyrir skemmstu í Gömlubúð þar sem Árdís Erna Halldórsdóttir og Þorkell Vignisson fóru yfir markaðsátak sem ráðist var í að hálfu sveitarfélagsins á þessum fordæmalausu tímum . Kynningin var góð og vel unnin af hálfu þeirra sem að henni komu og kemur hún til með að nýtast áfram þegar fram í sækir.

Það er fróðlegt að sjá hvað tækninni fleytir fram og samfélasmiðlar skipta orðið miklu máli í markaðs- og kynningarmálum.  Einnig er mikilvægt að leita til fagfólks til að fjármagni sé sem best varið þegar markaðsetja á svæði eins og okkar hér á suðausturhorninu.  Jafnframt skiptir miklu máli að ferðaþjónustuaðilar komi ásamt sveitarfélaginu að þeirri kynningu í gegnum Ríki Vatnajökuls.  

Afþreyingu skorti í þéttbýlinu

Eitt af því sem rætt var um á fundinum var afþreying í þéttbýlinu.  Margir telja að skortur sé á afþreyingu en undiritaður benti á að bæta mætti inn í kynninguna okkar góða golfvelli sem er einstaklega skemmtilegur og útsýnið stórkostlegt. Safnamál voru einnig rædd. Í haust hefjast framkvæmdir við Miklagarð það þarf að fara í ýmsar endurbætur svo hægt sé að koma honum í notkun. Hugmyndin er að þar gætu verið sýningar, listamenn og hannyrðafólk af öllum gerðum. Mikligarður sjálfur geymir djúpa og mikla sögu Hafnar. Ef setja á upp jöklasýningu af þeirri stærðargráðu sem sýningar eru í dag tel ég það nokkuð ljóst að einkaaðilar verði að koma þar að, með öflugri samvinnu við sveitarfélagið.  En margt er hægt að gera og mikilvægt er að koma sögu Hafnar til skila á einn eða annan hátt, t.d. með blönduðum leiðum eins og hafa möguleika á að setja eitthvað af  árabátum okkar og aðra muni sem tengjast sjósókn þar sem Akureyjan stóð og fara yfir sögu sjósóknar Hafnar þar í máli og myndum.

Kristján S. Guðnason

Formaður atvinnu- og menningarmálanefndar

Framkvæmdir við höfnina

Skráð af
ritstjorn
-

Framkvæmdir á vegum hafnarinnar í sumar eru þær helstar að nú er unnið að gerð sandfangara, þ.e. grjótgarðs, frá Suðurfjörum útí Einholtskletta og er áætlað að verkinu ljúki fyrir septemberlok á þessu ári.  Garðurinn verður um tvö hundruð metrar á lengd fullbúinn og hlutverk hans verður að hefta sandburð austur með fjörunni inná Grynnslin utan Hornafjarðaróss og auðvelda þar með siglingu stærri skipa um Ósinn.  Þessi framkvæmd er unnin í samvinnu við samgönguyfirvöld og er undir eftirliti starfsmanna Vegagerðarinnar. Framkvæmdin er afrakstur rannsókna sem farið hafa fram á undanförnum árum á svæðinu utan Hornafjarðaróss. 

Regluleg dýpkun

Dýpkun hafnarinnar er fastur liður í starseminni og fer fram á tveggja ára fresti. Dýpkunin í sumar, sem nú er lokið, var sú síðasta samkvæmt samningi við Dýpkunarfélagið Trölla ehf. og liggur fyrir að verkefnið verður boðið út að nýju á næstu mánuðum. Í hvert sinn er dælt um 50.000 m3 af fínu efni úr höfninni samkvæmt mælingum sem gerðar eru reglulega af starfsmönnum hafnarinnar og Vegagerðarinnar eftir atvikum.

Reynir Arnarson
Formaður hafnarstjórnar

Sumarið 2020

Skráð af
ritstjorn
-

Þetta ár verður sjálfsagt lengi í minnum haft. Það hefur án efa verið erfitt fyrir marga en sem betur fer birta öll él upp um síðir og vonandi verður allt komið nær því sem við viljum sjá í haust. Þó svo að það vanti mikið upp á þann fjölda erlendra gesta sem við hefðum viljað sjá þá hefur nú samt verið gestkvæmt og það hefur verið gaman að sjá hvað landinn hefur verið duglegur að leggja land undir fót og skoða fallega landið okkar. Við Hornfirðingar höfum ekki farið varhluta af þessari ferðagleði og gaman hefur verið að hjóla um bæinn og sjá hvað mikið er að gera á veitingarstöðum og gistihúsum. Tjaldstæðið hefur verið fullt dag eftir dag og golfvöllurinn hefur verið þétt skipaður.

Dreifbýlið

Heyskapur hefur gengið vel og heyrist mér að menn séu almennt að fá mikil og góð hey. Maður gæti ímyndað sér að fé komi líka vænt að fjalli þegar sprettutíðin hefur verið svona góð, en hér verð ég að viðurkenna fávísi mína. Það getur vel verið að vorið skipti meira máli en sprettan nú um mitt sumar en eitt veit ég, það er kostur að eiga mikið og gott hey í vetur.

Bryggjan  

Fiskirí hefur verið gloppótt. Uppsjávarveiðarnar hafa verið kaflaskiptar, þegar maður heldur að allt sé að fara á fullan snúning eftir að hafa fengið gott holl koma léleg holl í framhaldinu, manni er kippt niður á jörðina og nú eru uppsjávarskipin farin að sækja í smuguna. Humarveiðar hafa verið tregar kannski eins og menn reiknuðu með, því miður virðist sá stofn rétta rólega úr kútnum. Bolfiskbátarnir hafa verið að reka í ágætis afla en vissulega hafa verið rólegir dagar inn á milli. Þá sýnist mér að strandveiðar hafi gengið ágætlega, bæði hafa gæftir verið góðar og afli þokkalegur.

Sveitarfélagið, þú, ég og við öll

Það er nóg að gera hjá iðnaðar- og þjónustufólki og sveitarfélagið hefur leitast við að gera það sem það getur til að létta undir á þessum fordæmalausu tímum. Það réð inn ungt fólk til að vinna við verkefni sem setið hafa á hakanum, þörf verk en því miður hefur ekki alltaf verið tími til að sinna þeim. Nú eins og alltaf verða ríki og sveitarfélög að milda höggið af samdrætti í efnahagslífinu og setja framkvæmdir á stað ef þörf er á. Rétt tímasetning er mikilvæg, það er ekki gott ef það opinbera er að keppa um starfskrafta við almenna markaðinn en hinsvegar hefur þetta oft verið þröngur vegur að þræða því vissulega vilja menn láta eitthvað sjá eftir sig. Einn ágætur maður sagið einu sinni við mig að að stjórna væri létt verk þegar allt gengi sinn vana gang, það myndi fyrst reyna á stjórnunar hæfileikana þegar gæfi á bátinn.

Næsti vetur verður krefjandi fyrir ríki og sveitarfélög. Það hefur orðið talsvert tekjufall í ríkisbúskapnum og sveitarfélög hafa einnig flest fundið fyrir því og þá ekki síst sveitarfélög á Suðurlandi. En þó svo að á móti blási er ekkert svartnætti framundan, eins og fyrr segir birta öll él upp um síðir og við Austur-Skaftfellingar notum tíman til að laga og dytta að svo gestir okkar í framtíðinni njóti betur alls þess sem svæðið hefur upp á að bjóða.

Og almennt held ég að:

Það bera sig allir vel   
þótt úti séu stormur og él, 
allt í góðu inni hjá mér,   
lífið gott sem betur fer.

Ásgrímur Ingólfsson, forseti bæjarstjórnar

Allir leggjast á árarnar

Skráð af
ritstjorn
-

Eldri borgarar byggja minigolfvöll

Föstudaginn 10. júlí sl. var vígsluathöfn á nýjum minigolfvelli sem Félag eldri Hornfirðinga (FEH) á hugmyndina og heiðurinn af. En í maí 2019 kom erindi til bæjarráðs frá félaginu með ósk um styrk og stuðning sveitarfélagsins til að koma vellinum upp. Félagar FEH smíðuðu brautirnar en sveitarfélagið greiddi efniskostnað og uppsetningu þeirra. 

Sveitarfélagið varð við beiðninni, greiddi efniskostnað, undirbúning og uppsetningu en félagar FEH smíðuðu brautirnar. Enn fleiri fyrirtæki og einstaklingar aðstoðuðu með margvíslegum stuðningi við verkefnið. Komnar eru upp þrjár brautir af fimm og vil ég hvetja fólk til að vera duglegt að nýta þessa flottu minigolf aðstöðu og ganga vel um hana, jafnt unga sem aldna. 

Vinnuskólinn fegrar bæinn

Starfsmenn Vinnuskólans, unglingar og flokkstjórar hafa verið í hugmyndavinnu um ákveðin svæði í bænum auk þess að gera bæinn okkar hreinann og snyrtilegan. Það verður spennandi að sjá á næstu vikum hvernig þau vinna úr þeim hugmyndum. Hægt er að fylgjast með starfsemi þeirra á Facebook síðu Vinnuskóla Hornafjarðar en þar hafa komið skemmtilegar myndir fyrir og eftir yfirferð krakkanna um hin ýmsu svæði í bænum.

9 ára vilja endurbætur

Þá barst bæjarráði erindi frá tveim 9 ára drengjum í vikunni þar sem kom fram ósk um lagfæringar á malbiki og aðstöðu við hjólaramp á miðsvæðinu bak við Íþróttahúsið. Því erindi er að sjálfsögðu vel tekið og fer það til frekari vinnslu hjá umhverfis- og skipulagsnefndar sem vinnur að deiliskipulagi á svæðinu, einmitt með það m.a. að markmiði að gera miðsvæðið skemmtilegt til íþrótta- og útivistar fyrir alla aldurshópa.

Ábendingar vel þegnar

Við getum öll lagt okkar af mörkum til að gera samfélagið okkar enn betra. Ábendingum og tillögum að verkefnum er vel tekið. Á forsíðu heimasíðu sveitarfélagsins www.hornafjordur.is er hnappur „Ábendingar og fyrirspurnir“  sem ég hvet ykkur til að nýta og koma litlu sem smáu á framfæri við starfsfólk sveitarfélagisns.

Að lokum þá skulum við halda áfram að vera dugleg að plokka rusl og annað s.s. smásteina sem eiga greiða leið upp á minigolfbrautirnar, hreinsum þá burt svo þeir rífi ekki grasdúkinn. 

Njótum lífsins og alls þess skemmtilega sem það býður uppá! 

Ásgerður K. Gylfadóttir

Formaður bæjarráðs

Lífæð

Skráð af
ritstjorn
-

Fyrstu húsin á Höfn voru reist við Hafnarvík árið 1897. Þau standa enn. Gamlabúð hýsir Vatnajökulsþjóðgarð, Kaupmanshúsið og síðar Kaupfélagshúsið geymir hið góða veitingahús Ottó og hús Guðmundar söðlasmiðs stendur enn efst á Afkasthól þar sem gatan Bogaslóð liggur um.

Innsigling

Hin gjöfulu fiskimið fyrir utan Hornafjörð er ástæða fyrir þéttbýlinu sem tók að myndast fyrir meira en öld síðan. Ósinn hefur hins vegar verið ein stærsta ástæða þess að Höfn var ekki enn stærri verstöð en raunin er. Lengi hefur verið barist fyrir því að lagt verði fé í rannsóknir, hönnun og framkvæmdir við bætta innsiglingu um Ósinn.

Varnargarður sem nú er unnið að í Einholtskletta mun hjálpa til við að stöðva sandburð inn í Ósinn og minnka þannig líkur á að að skip taki niður um leið sinni um Grynnslin. Verkinu á að ljúka í september.

Þetta er fyrsta skrefið af mörgum í að búa til betri og öruggari innsiglingu. Með þessu skapast mikil tækifæri í sjávarútvegi með möguleika á komum stærri frakt- og fiskiskipa. Skemtiferðaskip sem núna komast ekki inn um Ósinn myndu örugglega glöð vilja leggjast að bryggju í Ríki Vatnajökuls.

Á Njáluslóðum

Skráð af
ritstjorn
-

Í útvarpinu les Ármann Jakobsson hina mögnuðu Brennu-Njáls sögu. Samhliða eru vikuleg viðtöl við Ármann í Víðsjá á Rás 1 þar sem hann greinir söguna og skýrir. Það má hiklaust mæla með að hlusta á þetta allt. Auðvelt er að nálgast þetta á RÚV sarpinum eða í RÚV appinu. Lestur Ármanns er mjög góður og skemmtilegur.

Helsta sögusvið Njálu eru Rangárvellir, Fljótshlíð og Landeyjar. En hún kemur víðar við bæði innanlands og erlendis. Hornafjörður er nefndur nokkrum sinnum, meðal annars í tengslum við utanferð Flosa eftir brennuna.

Örnefni hér benda enda til þess að til forna hafi verið höfn í Hornafirði. Festarklettar, Leiðarhöfði og sjálf Höfn benda í þessa átt. Í sögunni eru nefnd bæjarnöfn sem ennþá þekkjast eins og Stafafell og Bjarnanes en líka eru örnefni sem ekki finnast í dag. Ber þá helst að nefna Breiðá í Fellshverfi þar sem Kári bjó eftir sættir við Flosa. Kári hefur ekki verið setur á neitt kotbýli og þarna hefur því verið blómleg byggð á þeim tíma sem sagan gerist, um árið 1000. Núna ræður Breiðamerkurjökull þar ríkjum.

Það er vitað að við landnám var veðurfar mun hlýrra en síðar varð á Íslandi. Þess vegna voru jöklar minni og skriðjöklar sem við sjáum í dag ekki allir til. Það er gaman að ímynda sér hvernig umhorfs var á þessum tíma.

Íslendingar eru hvattir til að ferðast innanlands. Landið hefur margt upp á bjóða, bæði sögustaði og náttúruperlur. Það verður ekki mikið þjóðlegra en að spyrða saman hlustun á Brennu Njáls sögu og ferðalög um sveitir og bæi innanlands.

Samstarf um barnvænt sveitarfélag

Skráð af
ritstjorn
-

Það var stór stund í Svavarssafni í morgun þegar félags- og barnamálaráðherra Ásmundur Einar Daðason, Matthildur Ásmundardóttir bæjarstjóri og Birna Þórarinsdóttir framkvæmdastjóri UNICEF á Íslandi skrifuðu undir samkomulag um samstarf við framkvæmd verkefnisins barnvæn sveitarfélög. Verkefnið felst í því að sveitarfélagið innleiði Barnasáttmála Sameinuðu þjóðanna samkvæmt hugmyndafræði barnvænna sveitarfélaga sem UNICEF hefur þróað. Verkefnið er stutt með reglulegum og vel tilgreindum stuðningi félags- og barnamálaráðuneytisins og UNICEF með fræðslu og ráðgjöf.

Með undirskriftinni er staðfest samþykki sveitarfélagsins, að nota Barnasáttmálann sem viðmið og leiðarstef í starfsemi þess. Verkefnið hefst nú á tveggja ára innleiðingarferli. Að þeim tíma loknum getur sveitarfélagið, að uppfylltum forsendum verkefnisins, hlotið viðurkenningu frá UNICEF sem barnvænt sveitarfélag.

Í tilefni undirskriftarinnar skelltu ráðherra, bæjarstjóri og framkvæmdastjóri UNICEF sér á hoppubelginn góða með börnunum og nutu gleði dagsins í góða veðrinu.

Regnbogastígurinn

Regnbogastígurinn var svo málaður í kjölfarið. Margir lögðu þar hönd á plóg við að fegra umhverfið og fagna í leiðinni fjölbreytileikanum í samfélagi okkar í Sveitarfélaginu Hornafirði. 

Það var ánægjulegt að félags- og barnamálaráðherra tók þátt í því verkefni með okkur. 

Kvennréttindadagurinn

Að lokum langar mig að óska okkur öllum til hamingju með daginn! 19. júní, Kvennréttindadagurinn, er hátíðis- og baráttudagur kvenna á Íslandi þar sem við höldum uppá kosningarétt kvenna. Hann fengu konur þann 19. júní 1915, 40 ára og eldri.

Njótum dagsins, þökkum þeim sem hafa gengið hafa veginn á undan okkur og höldum baráttu fyrir réttindum einstaklingsins áfram!

Ásgerður K. Gylfadóttir

Áfangi

Skráð af
ritstjorn
-

Okkar góðu nágrannar í Skaftárhreppi fögnuðu stórum áfanga í vikunni þegar skóflustunga var tekin að nýrri gestastofu Vatnajökulsþjóðgarðs við Kirkjubæjarklaustur.  Þetta er gott skref fyrir þjóðgarðinn og íbúa í Skaftárhreppi.  Meginstöðvar þjóðgarðsins áttu að vera í byggð og mynda einskonar hlið í þjóðgarðinn.  Tvær þeirra eru í Sveitarfélaginu Hornafirði.  Önnur í hjarta Vatnajökulsþjóðgarðs í Skaftafelli og hin á Höfn.  Aðrar slíkar stöðvar eru nú þegar á Skriðuklaustri og Ásbyrgi.  Á milli átti að byggja upp starfstöðvar nærri útivistarsvæðum sem leggja áttu grunn að aukinni útivist og atvinnusköpun.

Jökulsárlón

Fyrir nokkrum árum var mörkuð sú stefna að við Jökulsárlón ætti ekki að byggja upp aðstöðu til næturdvalar.  Helga ætti svæðið daggestum.  Sjónarmið voru uppi um að þarna væri kjörið tækifæri til að byggja upp lúxusgistingu en því var hafnað þá.   Allir ættu að geta notið þess að eyða dagsparti við lónið á sínum eigin vegum, til að njóta þjónustu fyrirtækja sem ýmist gerðu út á lónið sjálft, náttúruperlur í nágrenni eða þiggja veitingar sem þar væru í boði. 

Það er enn stórt álitamál hvernig þjónustu eigi að byggja upp við lónið og á kostnað hvers, ríkisins eða þeirra sem ætla að þjónusta gesti þar.  Sennilega þarf blöndu af hvoru tveggja.  Mikilvægast er að sem flestir komist að og tækifæri sé fyrir einstaklinga að bjóða fram þjónustu sem gestirnir leitast eftir í formi veitinga og afþreyingar.  Það þarf ekki stóra þjónustumiðstöð þar sem einn aðili heldur í taumana, hvort sem það er einkafyrirtæki eða ríkið.  Frekar ætti að stefna að uppbyggingu í anda mathalla sem sprottið hafa upp víða um heiminn, með mörgun litlum veitingastöðum innan sömu veggja og aðstöðu utandyra þar sem mörg afþreyingarfyrirtæki geta þrifist

Höfn

Gamlabúð hefur verið meginstarfstöð Vatnajökulsþjóðgarðs um nokkurt skeið og þjónað því hlutverki vel sem og öðrum sem það merka mannvirki hefur gegnt í gegnum tíðina.  Það má draga fram að rétt yfir þúsund gestir sóttu hana heim áður en hún var flutt á sinn gamla stað fyrir um áratug og var á leiðinni að vera ein og yfirgefinn.  Nú eru gestirnir taldir í tugum þúsunda. Til lengdar á Gamlabúð samt að þjóna öðru hlutverki og Vatnajökulsþjóðgarður að byggja upp gestatofu álíka þeirri sem nú ris á Kirkjubæjarklaustri. 

Uppbygging innviða

Þrátt fyrir að stórar gestastofur í byggð geti þjónað þjóðgarðinum, gestum hans og byggðinni þar sem húsið rís þá er mikilvægast að byggja upp innviði fyrir útivist og atvinnusköpun við þær náttúruperlur sem þjóðgarðurinn sjálfur gæti aldrei þrifist án.  Bátur leggst ekki að landi með afla án hafna og eins verður ferðaþjónusta án grunngerðar ekki að veruleika.  Göngustígar, brýr, fræðsluskilti, sómasamlegar götur fyrir þá faraskjóta sem fólk velur ásamt lögum og reglum eru þær bryggjur sem þarf að byggja til að efla ferðaþjónustu við jaðar Vatnajökulsþjóðgarðs. 

Hjalti Þór Vignisson

1...111213...15Síða 12 af 15
© Framsóknarfélag Austur-Skaftafellssýslu