Í nútíma samfélagi eru fjarskipti ekki munaður, heldur grunn innviðir fyrir búsetu, rekstur og öryggi – hvort heldur sem er í Reykjavík eða Sveitarfélaginu Hornafirði.
Á málefnafundum Framsóknar og stuðningsmanna, í Öræfum og Suðursveit sérstaklega, viðruðu íbúar áhyggjur sínar af fjarskiptamálum í Sveitarfélaginu og langar mig að leggja orð í belg útfrá þeim umræðum sem sköpuðust þar.
Öræfi
Í Öræfum var ljósleiðarakerfi tekið í notkun 2010 þegar Öræfingar voru orðnir þreyttir á bið eftir ljósleiðara á vegum ríkisins og stofnuðu Fjarskiptafélag Öræfinga sem lagði ljósleiðara í sveitinni. Seinna var félagið sameinað Gagnaveitu Hornafjarðar. Þegar ljósleiðarakerfið í Öræfum var lagt á sínum tíma var það raðtengt um sveitina, ólíkt þeim ljósleiðarakerfum sem lögð voru síðar í sveitarfélaginu sem eru stjörnutengd. Þetta þýðir að ef eitthvað gerist í kerfinu, ljósleiðari er grafinn í sundur eða eitthvað þvíumlíkt að þá dettur netsamband af öllum bæjum, sem er ekki ákjósanleg staða.
Haustið 2021 var farið af stað í að athuga hvernig hægt væri að bæta kerfið og á 1008. fundi bæjarráðs þann 5. október 2021, lá fyrir tillaga frá Mílu um uppsetningu á búnaði til að umbreyta kerfinu. Kostnaður við búnaðinn áætlaður 7 milljónir. Lítið hefur þokast í málinu síðan, annað en erindi frá Mílu um yfirtöku á Gagnaveitu Hornafjarðar á 1112. fundi bæjarráðs þann 9. janúar 2024. Rúmlega ári síðar, eða þann 29. Júlí 2025, á 1182. fundi bæjarráðs, var tekin ákvörðun um að setja Gagnaveitu Hornafjarðar í söluferli. Síðan þá hefur ekkert verið fjallað um málið í fundargerðum sveitarfélagsins, en það er ljóst að sveitarfélagið hefði getað gert betur til að tryggja öruggt netsamband fyrir Öræfinga.
Suðursveit
Í Suðursveit er staðan sú að farsímasamband er víða gloppótt. Verst er það við Reynivelli og þar komum við að öðru máli sem hefur tekið sinn tíma í kerfinu. Á 67. fundi Umhverfis- og Skipulagsnefndar þann 1. nóvember 2023 var samþykkt að stofna lóð í landi Breiðabólsstaðar undir fjarskiptamastur og hús. Einhverjum mánuðum síðar var lóðin stofnuð, en síðar kemur í ljós að lóðin var of lítil og sækir Míla þá um stækkun á lóðinni. Sú umsókn var samþykkt á 87. fundi Umhverfis- og Skipulagsnefndar þann 23. október 2024. Í dag er ekki enn búið að skipta út þessari lóð, þó ég hafi það fyrir áreiðanlegum heimildum hjá Húsnæðis- og Mannvirkjastofnun að það geti gerst á allra næstu dögum. Það er því ljóst að ýmislegt hefur farið úrskeiðis í þessu máli engum einum um að kenna, en það á ekki að standa á Sveitarfélaginu þegar svona umbótamál í þágu farskiptaöryggis og almanna hagsmuna liggur við. Við Reynivelli, eins og við þekkjum flest, er lítið sem ekkert símasamband og á Hótel Jökulsárlóni býr í dag umtalsverður fjöldi fólks sem getur ekki hringt eftir aðstoð ef eitthvað kemur uppá nema að vera í netsambandi.
Nes
Í Nesjum er víða dapurt farsímasamband, til að mynda í kringum Þveit og langleiðina inn að Hoffelli. Ef að fyrirhugaðar framkvæmdir Bláa Lónsins ná fram að ganga er ljóst að styrkja verður farsímasamband á þessu svæði svo um munar. Þar verðum við að læra af mistökum og vera tilbúin til samstarfs þegar kallið kemur og liðka fyrir framkvæmdum sem bæta innviði og öryggi fólks á svæðinu.
Hér hef ég aðeins nefnt fá dæmi um vandræðasvæði í fjarskiptum í Sveitarfélaginu Hornafirði. Þessi upptalning er ekki tæmandi og ljós er að fleiri svæði, til að mynda á Mýrum, í Lóni og jafnvel í þéttbýlinu á Höfn, hafa verið til vandræða. Sem samfélag, sem stærir sig af því að vera ferðaþjónustusamfélag, verðum við að gera betur.
Finnur Smári Torfason 6. sæti hjá Framsókn og stuðningsmönnum
