Landsþing Sambands íslenskra sveitarfélaga var haldið sl. föstudag 31. mars á Grand Hótel í Reykjavík. Að vanda var þingið vel sótt af sveitarstjórnarfólki og bæjar- og sveitarstjórum landsins.
Að þessu sinni vorum við þrjú frá Sveitarfélaginu Hornafirði, undirrituð auk Eyrúnar Fríðu Árnadóttur formanns bæjarráðs og Gauta Árnasonar forseta bæjarstjórnar.
Á Landsþinginu í ár var rætt um stöðu kjarasamningsviðræðna sambandsins, húsnæðismál og málefni flóttafólks og hælisleitenda. Skoða má upptöku af þinginu hér https://www.samband.is/vidburdir/landsthing-2023/
Húsnæðismál
Húsnæðismálin eru okkur hornfirðingum hugleikin þar sem skortur er á íbúðarhúsnæði í sveitarfélaginu og lóðaskortur.
Það er því ánægjulegt að innviðaráðherra hefur nú staðfest nýja reglugerð um íbúakosningar sveitarfélaga og samþykkti bæjarráð í gær miðvikudaginn 5. apríl að hefja undirbúning að íbúakosningum um aðal- og deiliskipulag í Innbæ á grundvelli hennar.
Það verður gott fyrir alla aðila að geta loksins afgreitt það mál í kosningum eins og óskað var eftir.
Annars er unnið að þéttingu byggðar við Sandbakkaveg og einkaaðilar vinna að deiliskipulagi sem fjölgar íbúðareiningum bæði í þéttbýli og dreifbýli.
Þá afgreiddi umhverfis- og skipulagsnefnd frá sér skipulagslýsingu vegna íbúðarsvæðis ÍB5 sl. mánudag sem bíður afgreiðslu bæjarstjórnar í lok mánaðarins. Fundargerð umhverfis- og skipulagsnefndar má nálgast hér https://www.hornafjordur.is/stjornsysla/stjorn/fundargerdir/DisplayMeeting.aspx?id=ZpjnmyvnrEOyCftNbmqa5w1&text=
Móttaka flóttafólks
Þann 13. janúar sl. undirritaði félagsmálastjóri fyrir hönd sveitarfélagsins samning um móttöku átta flóttamanna. Samningurinn byggir á samræmdri mótttöku flóttafólks en hann nær til fólks sem fengið hefur alþjóðlega vernd eða dvalarleyfi á grundvelli mannúðarsjónarmiða hér á landi. Markmiðið er að tryggja flóttafólki samfellda og jafna þjónustu óháð því hvaðan það kemur og í hvaða sveitarfélagi það sest að.
Eftir því sem undirrituð kemst næst hefur þegar verið tekið á móti átta einstaklingum og gengið afar vel. En óskað hefur verið eftir yfirferð í bæjarráði um málið, þ.e. framlagningu samnings, gang mála, skuldbindingar sveitarfélagsins og aðkomu ríkisins.
Þegar þessi pistill er skrifaður skín sólin á Höfn sem vonandi gefur góð fyrirheit um að vorið verði okkur gott hér í sveitarfélaginu. Með þá ósk í brjósti óska ég lesendum Leiðarhöfða gleðilegra páska!
Ásgerður Kristín Gylfadóttir, bæjarfulltrúi Framsóknar, aðalmaður í bæjarráði og umhverfis- og skipulagsnefnd.
