Jöklasýning og önnur menning

Skráð af
ritstjorn
-
Kristján Guðnason

Frá því Gamlabúð var flutt aftur niður á hafnarsvæðið árið 2013 hefur Vatnajökulsþjóðgarður leigt húsnæðið af sveitarfélaginu, rekið þar upplýsingarmiðstöð, sýningu og skrifstofuaðstöðu starfsmanna. Starfsmönnum þjóðgarðsins á Höfn hefur fjölgað undanfarið og er von til þess að fjölgi enn frekar á næstu árum. Nú þegar er aðstaðan orðin of lítil og þarf því  að gera ráðstafanir til þess að taka á móti þeim störfum. 

Sveitarfélagið og Vatnajökulsþjóðgarður hafa skrifað undir viljayfirlýsingu um að byggja nýtt eða finna annað hentugt húsnæði sem  einnig gæti hýst jöklasýningu sem þjóðgarðurinn kæmi til með að sjá um í samstarfi við sveitarfélagið. Því auðvitað á jöklasýning hvergi annarstaðar heima en hér á okkar svæði og þar þarf að vanda til verka. 

Jöklasýningin þarf í senn að vera fræðandi og eftirtektaverð svo hún dragi að ferðafólk. Nú þegar hefur verið fundað um málið og er einhugur um að vinda sér í þetta verkefni. Við það að þjóðgarðurinn fari úr Gömlubúð opnast möguleikar á að sveitarfélagið setji upp veglega sýningu í húsinu t.d. um sögu Hafnar. Tíminn líður hratt svo skynsamlegt væri að fara undirbúa þá sýningu. 

Ég tel að gefa eigi  íbúum kost á að koma með sínar hugmyndir og væri ekki úr vegi að hafa íbúafund þar sem málið væri unnið áfram. 

Sýning í Gömlubúð myndi létta á Álaleirunni sem nú hýsir safnakostinn og þreytist ég seint á því að tala um að í Áleirunni eigi að vera opnar geymslur þar sem allir eiga að hafa aðgang þegar blessuð veiran gengur yfir. 

Svavarssafn

S.l. laugardag var stórkostleg sýning opnuð í Svavarssafni á verki Hlyns Pálmasonar; Harmljóð um hest.  Það er okkur hornfirðingum afar mikilsvert að eiga slíkan listamann og vonandi kemur hann til með að búa hér um ókomna tíð, og að svæðið fái að njóta hans einstöku hæfileika.

Sindrabær Menningarhús

Það þarf að klára endurbætur á Sindrabæ, og það þarf að gera það vel. Það er mín skoðun að það sé vel þess virði að taka samtalið um hvort Sindrabær geti ekki orðið Menningarhúsið okkar sem gæti hýst auk tónlistar bíósýningar, leiksýningar og fleira. Með viljann að vopni hef ég trú á að svo gæti orðið.

Örnefnaskilti

Nú á vormánuðum eigum við von á því að ný örnefna skilti verði sett niður við göngustígin á Höfn. Það er mikilvægt að örnefni glatist ekki og er þetta ein leiðin til að vekja athygli á þeim. Ungir og gamlir fái tækifæri til að glugga í skiltin sér til gagns og gamans.

Kristján S. Guðnason, bæjarfulltrúi og formaður atvinnu- og menningamálanefndar.

Ný líkamsræktaraðstaða og framkvæmdir við Hofgarð

Skráð af
ritstjorn
-

Líkamsrækt

Hönnunarvinna á nýrri líkamsræktarstöð hér á Höfn er langt á veg komin og var kynnt  hagsmunaaðilum á dögunum og hafði áður fengið kynningu í bæjarráði. Ef allt gengur að óskum gætu framkvæmdir við bygginguna hafist á vordögum og er góð von til þess. Eins og flestum er kunnugt verður líkamsræktarstöðin byggð áföst sundlauginni og verður á tveimur hæðum. Núverandi búningsklefar sundlaugarinnar koma til með að nýtast fyrir nýja líkamsræktarstöð en þó verða nýir útiklefar hluti byggingarinnar sem nýtast fyrir bæði sundlaug og líkamsrækt. Í byggingunni er gert ráð fyrir rýmum fyrir tengda starfsemi sem hægt verður að leigja út en það eru rými fyrir t.d. nuddara, sjúkraþjálfara, snyrtifræðinga o.f.frv. Auk þessa gera teikningar ráð fyrir bættri aðstöðu fyrir hreyfihamlaða og kynsegin fólk. Með tilkomu nýrrar líkamsræktarstöðvar kemur sveitarfélagið m.a. til með að losa um gjöld vegna leigu á núverandi húsnæði og verður byggingin þannig um leið virðisaukandi fyrir sveitarfélagið.

Í núverandi húsnæði líkamsræktarstöðvar við Álaugarveg 7 nýtast u.þ.b. 200 m² fyrir líkamsræktartæki og hópatíma. Samskonar rými í nýrri byggingu verður rúmlega 400 m² auk þess sem að gangar og stigahol geta nýst fyrir ýmsa líkamsrækt. Einnig koma stærri rými í nýrri líkamsræktarstöð til með að nýtast mun betur þar sem t.d. tækjasalurinn í núverandi líkamsræktarstöð þykir nýtast illa vegna lögunar hans. Samtals verður nýbyggingin um 670 m². Þær skoðanir hafa komið fram að byggingin sé ekki nægjanlega rúmgóð og sjálfsagt eru mismunandi skoðanir á því. Það verður ekki svo að allir þeir sem stunda líkamsrækt geti stundað hana á sama tíma í húsinu og það þarf að skipuleggja hópatíma og aðra skipulagða starfsemi í byggingunni vel til að nýta hana sem best. En staðreyndin er hins vegar sú að verið er að rúmlega tvöfalda það rými sem nýtist fyrir líkamsræktartæki og hópatíma ýmis konar. Og vert er einnig að taka það fram hér að verið er að vinna nýtt skipulag fyrir miðbæjarsvæðið sem mun gera ráð fyrir mögulegri stækkun á líkamsræktarstöðinni í framtíðinni. Nýtt húsnæði líkamsræktarstöðvar ætti því að vera mikil bylting fyrir notendur hvað húsakostinn varðar og vonandi heldur starfsemin áfram að blómstra í nýjum húsakynnum, hvernig svo sem henni verður háttað á nýjum stað.

Vert að geta þess að ný líkamsræktarstöð kemur til með að vera fyrsta umhverfisvottaða byggingin á Hornafirði, með svokallaða BREEM vottun, sem kemur m.a. fram í efnisvali, lýsingu, hljóðeinangrun og loftræsingu.

Að þessu öllu sögðu held ég að við getum horft með tilhlökkun fram vegin hvað varðar húsakost líkamsræktar í sveitarfélaginu og það fer að fækka afsökunum sem undirritaður hefur til þess að mæta ekki ekki ræktina!

Hofgarður

Framkvæmdir í Hofgarði voru boðnar út á dögunum. Skemmst er frá því að segja að bæjarráð samþykkti eina tilboðið sem barst í verkið sem hljóðaði upp á 58.515.748 kr. frá Þingvað ehf. og var tilboðið u.þ.b. 7% yfir kostnaðaráætlun. Og það er því mikil ánægja að segja frá því að framkvæmdir hefjast á næstu dögum og á þeim að vera lokið 8. ágúst n.k. Þessar framkvæmdir koma til með að stækka og bæta húsnæði og aðstöðu leikskólans Lambhaga til muna bæði fyrir börn og starfmenn hans. Auk þess verður, eftir framkvæmdirnar, innangengt á milli leikskólans og grunnskólans sem eru samreknir. Við það verður meiri og betri samnýting á starfsfólki skólanna. Á meðan á framkvæmdum stendur færist skólastarf í leik- og grunnskólanum í Hofgarði yfir í Efribæ á Fagurhólsmýri. Einnig koma framkvæmdirnar til með að bæta salernisaðstöðu grunnskólahluta hússins til muna en núverandi salerni eru upprunaleg eða frá árinu 1986 og því komin tími á endurbætur á þeim.

Björgvin Óskar Sigurjónsson, bæjarfulltrúi, varaformaður bæjarráðs og varaformaður fræðslu- og tómstundanefndar.

Stækkun Sjónarhóls

Skráð af
ritstjorn
-

Það eru tæp 4 ár síðan nýtt og endurbætt húsnæði Sjónarhóls var tekið í notkun. Í fyrra fór að bera á plássleysi og biðlistar að myndast. Óvænt staða verð ég að segja svo stuttu eftir miklar og þarfar breytingar, og ljóst að húsnæðið hefði þurft að vera stærra frá upphafi. En hvað sem því líður þá er staðan þessi og við urðum að hafa hraðar hendur og bregðast við og var opnun leikskóladeildar fyrir yngstu börnin í Selinu skammtímalausn sem talin var ákjósanlegust. Í mars verða hugsanlega 11 börn í Selinu.

Heildarfjöldi barna á Sjónarhóli í mars verður því um 128, og að mati starfsfólks rúmar skólinn mest 108 börn, ákjósanleg tala er á bilinu 102-108 börn. Áfram þurfum við að vinna hratt og ákveðið í að vinna að lausn til lengri tíma, eða næstu 10 – 15 ára. Í þeirri vinnu þarf fyrst og fremst að vanda til verka með samtali allra hlutaðeigandi. Það þarf líka að horfa til þess að samkvæmt húsnæðisáætlun má gera ráð fyrir um 150 börnum á leikskólaaldri eftir 10 ár. Það er að sjálfsögðu mjög jákvæð þróun ef sú spá gengur eftir. 

Biðlistavandinn – Hugsað í lausnum

Biðlistavandinn er enn til staðar og standa vonir til þess að við fáum áfram afnot af Selinu næsta skólaár, en þá fer stærri árgangur út en kemur inn. En það er ljóst að haustið 2023 þarf að vera búið að koma fyrir öðru húsnæði sem hýsir tvær deildir. Miðað við þær upplýsingar sem búið er að afla er útlit fyrir að fermetrafjöldinn þurfi að vera á bilinu 250 – 300 til að hýsa um 40 börn. Að koma fyrir 250 – 300 fm húsnæði á lóðina verður ekki einfalt mál en með góðri samvinnu þeirra sem málið varðar og fagaðila erum við staðráðin í að finna hentuga lausn.

Það þarf t.a.m. að taka tillit til praktískra atriða sem varða innra starf leikskólans, tengingu við núverandi húsnæði sem mun nýtast vel og taka minnsta plássið af leiksvæði nemendanna og jafnframt valda sem minnstri röskun á framkvæmdartíma. Hugmyndir frá arkitektum hafa verið skoðaðar og er verið að útfæra þrjár þeirra betur að ósk nefndarmanna í fræðslu- og tómstundarnefnd, umhverfis- og skipulagsnefnd og fulltrúa Sjónarhóls. Við viljum vanda til verka og sjá til þess að húsnæðið geti hýst 150 nemendur svo vel sé. Ef spá um aukinn barnafjölda gengur eftir þá  er kominn tími til að útbúa skipulag til framtíðar þar sem gert verður ráð fyrir nýrri leikskólabyggingu á nýjum stað.

Ég vil nýta tækifærið og þakka stjórnendum og öllu starfsfólki Sjónarhóls fyrir þolinmæði, dugnað og sveigjanleika sem þau hafa sýnt í stöðunni. Staðan er ekki ákjósanleg en að hafa jákvætt og lausnamiðað fólk með sér í þessari vinnu er gríðarlega mikilvægt.

Að auki, frístundastyrkur fyrir 5 ára

Á fundi fræðslu- og tómstundanefndar í desember sl. var farið yfir frístundastyrki í 26 sveitarfélögum fyrir árið 2021. Sú yfirferð sýndi að styrkur Sveitarfélagsins Hornafjarðar að upphæð kr. 50.000 er vel samanburðarhæfur og aðeins fimm Sveitarfélög af þessum 26 sem veita hærri styrk. Ákveðið var að bæta um betur og veita foreldrum 5 ára barna (miðað við árið) styrk að upphæð kr. 10.000. Við hvetjum foreldra 5-18 ára barna sem eru í skipulögðu íþrótta- og tómstundastarfi þar með talið tónlistarnámi við Tónskólann að nýta þessa búbót sem styrkurinn er.

Íris Heiður Jóhannsdóttir, varabæjarfulltrúi og formaður fræðslu- og tómstundanefndar.

Húsnæðismál

Skráð af
ritstjorn
-

Sveitarfélagið Hornafjörður er frábær staður að búa á. Hér höfum við aðgang að námi á öllum skólastigum, heilbrigðis- og félagsþjónusta er góð og aðgengileg. Aðstaða til fjölbreyttrar íþróttaiðkunar, verslun og þjónusta til staðar og öflugt menningarlíf a.m.k. þegar heimsfaraldur er ekki að herja á. Atvinna hefur verið nokkuð trygg og þrátt fyrir atvinnuleysi í dag, sem án efa tengist covid-19 heimsfaraldri er talað um skort á starfsfólki í ferðaþjónustuna sem er að fara á fulla ferð eftir erfiða tíma vegna covid.

Mikil uppbygging hefur verið í gangi síðustu ár í sveitarfélaginu. Það á bæði við í þéttbýlinu á Höfn og í dreifbýlinu, lóðaskortur hefur verið að myndast og er nú orðinn hamlandi þáttur. 

Í dag er íbúafjöldinn í sveitarfélaginu 2.444 þar af 1.788 á Höfn, Nes 242, Lón 25, Mýrar 61, Suðursveit 103 og Öræfi 225.

Húsnæðisáætlun

Bæjarstjórn Hornafjarðar afgreiddi í gær húsnæðisáætlun sveitarfélagsins en þar er dregin fram mynd húsnæðismála, innviðir sveitarfélagsins greindir og horft til framtíðar. En megin markmið með gerð húsnæðisáætlanna er að stuðla að auknu húsnæðisöryggi í sveitarfélaginu. Húsnæðisáætlunina má nálgast undir fundargerð bæjarstjórnar https://www.hornafjordur.is/stjornsysla/stjorn/fundargerdir/DisplayMeeting.aspx?id=XAblCsRrIkS6mOk7zqdmUA1&text= en hún verður einnig aðgengileg með öðrum húsnæðisáætlunum á vef Húsnæðis- og mannvirkjastofnunar sem hefur eftirlit með með uppfærlsu þeirra á landsvísu.

Höfn

Unnið hefur verið að þéttingu byggðar á Höfn en skipulagið „þétting byggðar – innbær „ mun fara í íbúakosningu vonandi í mars n.k. Einnig er í vinnslu deildiskipulag „Leirusvæði 2“ þar sem byggt verður á uppfyllingunni austan við Álaleiru og Hagaleiru. 

Unnið er að undirbúningi fleiri íbúðasvæða m.a. á grunni íbúafundar um málið sem haldinn var sl. haust. Margar góðar hugmyndir komu fram bæði um ný svæði og frekari þéttingu byggðar. 

Hrolllaugsstaðir

Nú styttist í að fimm íbúðir verði klárar í gamla skólahúsnæðinu á Hrollaugsstöðum en þær fara allar í útleigu. Á bæjarstjórnarfundi í gær 10.febrúar var bæði aðal- og deiliskipulag við Hrollaugsstaði afgreitt til Skipulagsstofnunar en þar er fyrirhuguð frekari íbúabyggð.

Öræfi

Mikil uppbygging er við Borgartún, ofan við Hofgarð og styttist í að það svæði verði fullbyggt miða við núverandi skipulag. En fólksfjölgun hefur verið mikil í Öræfum síðustu ár, enda má segja að Öræfin séu vagga ferðaþjónustunnar í sveitarfélaginu og stutt í einstakar náttúruperlur.

Það er ljóst að mikið er framundan í skipulagsmálum tengdum íbúabyggð en með flutningi Skipulagsstofunar til hins nýja innviðaráðuneytis sem fer nú bæði með húsnæðis- og skipulagsmál stendur til að huga að einföldun og skilvirkari afgreiðslu skipulagsmála sem mun vonandi koma sveitarfélögum vel sem eru í sambærilegri stöðu og Sveitarfélagið Hornafjörður.

Ásgerður K. Gylfadóttir, formaður bæjarráðs.

Vegur til framtíðar

Skráð af
ritstjorn
-

Bættar samgöngur eru baráttumál hverra samfélaga, það má með sanni segja að góðar samgöngur séu lífæð landsbyggðarinnar. Traust vegakerfi og góðar samgöngur eru forsenda þess að mannlíf og atvinnulíf geti vaxið og dafnað í þéttbýli sem dreifbýli. Gott vegakerfi leiðir einnig af sér tímasparnað og eitt það mikilvægasta, minni slys. En álag á vegum landsins hefur aukist mikið á undanförnum árum meðal annars vegna fjölgunar ferðamanna. Allir sem hafa keyrt um suðurlandi austur á Höfn hafa orðið varir við aukna umferð og krafa hefur verið uppi um að bæta þurfi vegakerfið.

Því er gleðilegt að segja frá því að fljótavegur austur á Höfn í Hornafirði verður fljótlega að veruleika. Hér er um að ræða langþráða vegaframkvæmd sem mun bæta umferðaröryggi og stytta ferðatíma sem um munar. Fljótavegur er svo sannarlega á áætlun og komin í útboðsferli. Gert er ráð fyrir að nú í upphafi febrúarmánaðar komi fram lokatilboð í verkið og skrifað verði undir samninga í sama mánuði. 

Ný brú yfir Hornafjarðarfljót mun stytta hringveginn um 12 kílómetra þvert yfir Hornafjörð. Um er að ræða fyrsta verkefnið af sex sem samþykkt voru í lögum um samvinnuverkefni um samgönguframkvæmdir. Miðað er við að framkvæmdir hefjist á næsta ári og þær taki þrjú til þrjú og hálft ár. 

Það er ánægjulegt að sjá góðar hugmyndir verða að veruleika, sérstaklega hugmyndir sem þessar sem koma til með að bæta samfélagið. 3 ár eru stuttur tími, framtíðin er handan við hornið. 

Hafdís Hrönn Hafsteinsdóttir, 7. þingmaður Suðurkjördæmis, Framsóknarflokki.

Kosningavor

Skráð af
ritstjorn
-

Nú líður að lokum þessa kjörtímabils með kosningum þann 14. maí n.k. og er undirbúningur hafinn eða að hefjast hjá flokkum og framboðum um allt land. 

Það er að mörgu að hyggja á þessum tímapunkti en fyrst og fremst að íbúar íhugi og taki afstöðu til þess að taka þátt og bjóða sig fram til starfa.

Það er kostur fyrir hvert samfélag að hafa úr fjölbreyttum hópi framboða að velja en oft heyrir maður að kjósandinn vilji frekar velja einstaklinga en framboð/lista. Eins og staðan er í dag er ekki persónukjör nema þar sem engir listar eru bornir fram en þar eru allir íbúar á kjörskrá nema í sérstökum tilfellum.

Starfsaðstæður kjörinna fulltrúa

Í stefnumótandi áætlun um málefni sveitarfélaga sem samþykkt var á Alþingi 2021 og aðgerðaráætlun til ársins 2023 (https://www.stjornarradid.is/verkefni/sveitarstjornir-og-byggdamal/sveitarstjornarmal/stefna-i-malefnum-sveitarfelaga-2019-2033/ ) eru settar fram 11 aðgerðir með það að markmiði að styrkja sveitarstjórnarstigið. Aðgerð átta snýr að starfsaðstæðum kjörinna fulltrúa og hefur starfshópur hafið störf þar sem skoðað er m.a. álag/kjör/aðstæður kjörinna fulltrúa, hlutverkagreining, samskipti í sveitarstjórnum og utanaðkomansi áreiti. Markmið hópsins er að kynna tillögur sínar núna í haust.

Laun kjörinna fulltrúa

Laun kjörinna fulltrúa fyrir sín störf í þágu samfélagsins eru mjög mismunandi yfir landið og eftir stærð sveitarfélaga. Samband íslenskra sveitarfélaga hefur kannað kjörin með reglubundnum hætti og getfið út leiðbeiningar þar sem sveitarstjórnir ákveða ennþá sín kjör sjálfar. Reynist það sveitarstjórnum því oft erfitt að gera breytingar þar sem launahækkanir eigin launa eru ekki góðar eða líklegar til vinsælda. Hér í okkar sveitarfélagi hefur sá háttur verið á að laun hafa verið rædd við gerð fjárhagsáætlunar í lok kjörtímabils. Breytingar ef einhverjar hafa verið látnar taka gildi við upphaf nýs kjörtímabils þannig að bæjarfulltúar eru ekki að ákveða eigin laun heldur nýrrar bæjarstjórnar.

Vinnutími

Þau tólf ár sem undirrituð hefur setið í bæjarstjón hafa verið tekin skref í að færa fundi bæjarráðs, sem er vikulega á dagvinnutíma í stað þess að vera kl.16 á daginn. Mánaðarlegir bæjarstjórnar- og nefndafundir eru eftir dagvinnutíma en nefndum er frjálst að ákveða annan tíma dags henti það nefndarfólki. Fundartíminn þarf að vera skipulagður þannig að allir geti átt kost á að mæta og sinna sínu starfi sem kjörinn fulltrúi. 

Hins vegar gleymist oft í umræðunni að starf kjörins fulltrúa jafnt í bæjarstjórn sem í nefndum er ekki aðeins bunið við fundarsetu heldur þarf að undirbúa sig fyrir fundi, fylgja eftir málum og oft á tíðum eru ýmsir fundir/ráðstefnur/málþing á milli fastra funda sem þarf að undirbúa sig fyrir og mæta á.

Álag og áreiti

Síðustu ár hefur umræðan um álag og áreiti á kjörna fulltrúa verið meira í umræðunni. Flest ef ekki öll þekkjum við dæmi úr eigin lífi eða úr fjölmiðlaumfjöllun þar sem þessi þáttur er dreginn fram og áhrif hans á líf og sjórnmálaþátttöku kjörinna fulltrúa og á fjölskyldur þeirra. Það á jafnt við hér í Sveitarfélaginu Hornafirði og á öðrum stöðum í heiminum því miður. Þetta er alþjóðlegt viðfangsefni sem fælir fólk frá þátttöku og á við bæði í litlum sveitarfélögum og stórborgum. Þessi þáttur er einn af þeim sem áhersla er á í umfjöllun um starfsaðstæður kjörinna fulltrúa hér á landi. Hvernig við upprætum áreiti og jafnvel ofbeldi er samfélagsverkefni þar sem hver og einn þarf að leggja sitt lóð á vogarskálarnar. 

Þakklæti

Nú er undirrituð að ljúka sínu þriðja kjörtímabili. Á þessum tíma ég hef fengið tækifæri til að sinna fjölbreyttum verkefnum með stórum hópi fólks í sveitarfélaginu, á landsvísu og á alþjóðavettvangi. Ég er þakklát fyrir þau tækifæri sem ég hef fengið og það fjölmarga fólk sem hefur staðið við bakið á mér og stutt mig í mínum verkefnum. 

Samfélagsmiðlar

Samfélagsmiðlar hafa á þessum tólf árum orðið stór þáttur í því að við kjörninr fulltrúar komum okkar sjónarmiðum á framfæri og orðið vettvangur íbúa til að koma sínum sjónarmiðum á framfæri. Þó er það nú þannig að þó við séum öll (flest) þarna inni þá heyrum við ekki alltaf í hvort öðru. Stundum á sér stað samtal en samfélagsmiðlar eru ekki formlegur vettvangur þess og sem betur fer tekur fólk enn upp símann, sendir tölvupóst eða hittist til að ræða málin, bæði gagnrýna og hrósa.

Framhaldið

Undanfarið hafa fulltrúar í bæjar-, borgar- og sveitarstjórna hver af öðrum verið að tilkynna hvort þau hyggist gefa kost á sér til áframhaldandi vinnu og fjölmargir liggja enn undir feldi að vega og meta hvað skal gera. Ég hef ekki tekið ákvörðun um það hvort ég gef kost á mér til áframhaldandi vinnu á þessum vettvangi, er undir feldi ennþá.

En ég hvet alla til að íhuga það að gefa kost á sér til starfa fyrir samfélagið. Við þurfum á fjölbreyttum hópi að halda, af öllum kynjum, aldri og með ólíkan bakgrunn. En það hefst ekki nema að fólk standi upp frá tölvunni (áður elhúsborðinu) og gefi kost á sér. 

Ásgerður K. Gylfadóttir, formaður bæjarráðs og oddviti framboðs Framsóknar og stuðningsmanna þeirra 2018-2022.

Bæði ljúft og skylt

Skráð af
ritstjorn
-
Ásgrímur Ingólfsson

Gleðilegt ár og þakka ykkur fyrir gamla árið sem var keimlíkt árinu á undan hvað varðar veiru skrattann. Það komu alltaf aðrar brekkur loksins þegar maður hélt að farið væri að sjá fyrir endann á þeirri sem maður var að klífa. En svona er lífið, hæðir og lægðir og svo ég verði nú enn dýpri, þá birta öll él um síðir.

En ekki átti þessi pistil minn að fjalla um þær vangaveltur hvort og hvenær við losnuðum við covid. Nei, ég ætla að fjalla um nokkur atriði sem ég sá á ferð minni um fésbókina. Mér verður það stundum á þegar stímin eru löng að þvælast þar um og lesa alla þá uppbyggilegu umræðu sem þar þrífst. Sem er oft á tíðum gangrýnislaus og án þess að fólk geri minnstu tilraun til að kynna sér málin þó svo að ein leit á Google myndi upplýsa viðkomandi um staðreyndir málsins.

Sveitasjóður

Tekjur og gjöld: Eins og allir vita þá er mikilvægt að hafa þessa tvo liði í lagi þegar menn reka heimili, fyrirtæki eða sveitarsjóð. Ef misræmi verður mikið þá er ekki annað að gera en að taka á vandanum. Auðvitað þurfa ekki öll ár að vera eins og auðvitað er hlutverk heimila, fyrirtækja og sveitasjóðs mismunandi. Sveitarfélagið Hornafjörður hefur verið rekið með miklum ágætum undafarin ár. Það hefur skilað ríflegum hagnaði til fjárfestinga og jafnhliða haldið uppi háu þjónustustigi við íbúan.

Auðvitað geta menn svo deilt um hvort það hefði átt að setja meira hér eða þar. Þegar launakostnaður sveitafélaga í landinu hefur aukist um 16% og við Hornfirðingar höfum ekki farið varhlut af því. Ásamt því að tekjur hafa ekki aukist að verðgildi og ekki eins og menn höfðu væntingar um fyrir nokkrum misserum síðan er ekki annað að gera en að bretta upp ermar, reyna að auka tekjur, draga úr framkvæmdum eða skerða þjónustu. Bæjarstjórn hefur ekki viljað skerða þjónustu og kemur tvennt til. Annars vegar hefði það þýtt einhverjar uppsagnir og þá aukið atvinnuleysi á svæðinu og svo hins vegar þá var það samdóma álit að við yrðum að standa við bakið á okkar stofnunum í því álagi sem fylgir covid.

Það varð því úr að fresta framkvæmdum svo sem á Sindrabæ, fara yfir tekjuhliðina og leitast við að láta þá borga sem nota þjónustu sveitarfélagsins, leiðrétta þætti sem hafa verið gerðar athugasemdir við en vera þó hófleg í gjaldtöku og passa eftir mætti að vera samanburðarhæf við önnur sveitafélög. En yfir þetta er ágætlega farið í svari sveitarfélagsins https://www.hornafjordur.is/stjornsysla/sveitarfelagid/frettasafn/gjaldskrarbreytingar-hja-sveitarfelaginu-hornafirdi við forsíðufrétt sem birtist á síðu verkalýðfélagsins Afls.

Án þess að vera einhver „bezzervizzer“ þá sjá allir sem vilja sjá að sveitarfélagið varð að bregðast við þeim aukna launakostnaði sem það stendur frami fyrir og hefði verið mjög óábyrgt að sitja með hendur í skauti, láta bæjarstjórnarkosningar líða og láta næstu bæjarstjórn sitja upp með Svarta Pétur. Sveitasjóður verður að skila einhverjum afgangi til þess að það þurfi ekki að taka lán fyrir öllum framkvæmdum, hvað þá rekstri. Það er ekki boðlegt og bara ávísun á vandræði í framtíðinni og auknar álögur á komandi kynslóðir.

Vinsældir 

 Að vera í bæjarstjórn er ekki vinsælda kosning, það er þjónusta sem bæjarstjórnarfólk tekur að sér fyrir samfélagið og get ég fullyrt að allir eru í þessu af heilindum, gera þetta eftir bestu samvisku og vilja láta gott af sér leiða. Sjálfsagt er fólk þarna úti sem er betur til þess fallið en þeir sem standa í þessu streði þessi misserin og sjálfsagt er hægt að gera betur og sjálfsagt er líka hægt að gera verr en hvað um það, allir reyna að gera sitt besta.

Aðeins um söfn, íþróttamannvirki og aðrar framkvæmdir

Ég hef aðeins séð vangaveltu um hitt og þetta á þeim merka miðli sem nefndur var hér fyrr í greininni. Ég ætla ekki að fara með sama vælið og er hér fyrir ofan en þetta er allt spurning um forgangsröðum, þörf, fjármagn og skynsemi. Sveitafélagið Hornafjörður hefur lágt skuldahlutfall og gæti gert þetta allt og meira til ef menn eru tilbúnir í auknar lántökur. Þó með þeim fyrirvara að það fengjust iðnaðarmenn til að framkvæma verkefnin. Mér sýnist okkar fólk hafa nóg fyrir stafni svo kannski er rétt að dreifa verkefnunum.

Að lokum 

Það eru sveitarstjórnarkosningar í vor og ég er ekki í vafa um að þau framboð sem bjóða fram verða með gott fólk á listum og hvet ég þá Hornfirðinga sem áhuga hafa á framgangi okkar sveitarfélags að setja sig í samband við þær fylkingar sem ætla að bjóða fram. Bjóða sig á lista eða í nefndir eftir kosningar. Svo veit ég að allir listar eru boðnir og búnir að taka við hugmyndum inn í málefnavinnuna, við getum gert gott betra.

Ásgrímur Ingólfsson, forseti bæjarstjórnar.

Áramót

Skráð af
ritstjorn
-

Ég óska ykkur öllum gleðilegs nýárs með þökk fyrir árið sem nú er liðið um leið og ég óska ykkur hamingju á velfarnaðar á árinu 2022.

Það er vaninn að líta yfir farinn veg á þessum tímamótum. Í pistli mínum fyrir ári síðan var Covid ofarlega í huga flestra, má segja að þetta ár hafi endað með hvelli hvað Covid varðar með hæstu smittölum sem hafa sést hér á landi og einnig hér í okkar sveitarfélagi. Við áttum líklega flest von á því í sumar þegar öllu var aflétt að nú værum við laus við þennan fjanda! Svo var nú því miður ekki og verðum við líklega að læra að lifa með þessari veiru en vonum að Omikron afbrigðið sé upphafið af endalokum faraldursins og að þetta verði orðin eins og hver önnur kvefpest fyrr en varir.

Framkvæmdir og uppbyggingarverkefni í sveitarfélaginu

Sveitarfélagið var með háleit markmið í framkvæmdum fyrir árið og var stærsta og umfangsmesta framkvæmdin endurbætur á aðalgötunni okkar, Hafnarbrautinni, sem tókust afar vel þrátt fyrir ýmsar hindranir. Aðrar framkvæmdir voru endurbætur á Víkurbraut 24 sem nú hýsir alla velferðarþjónustu sveitarfélagsins. Starfsemin flutti öll þangað s.l. haust og er nú loks öll undir sama þakinu eftir að hafa verið dreift um þéttbýlið til fjölda ára. Velferðarþjónustan verið að styrkjast á síðustu árum með aukinni áherslu á virkniþjónustu við alla þjónustuhópa ásamt því að ný verkefni hafa færst yfir til málaflokksins s.s. dagdvöl aldraðra í Ekru og þjónusta við íbúa sem áður dvöldu á dvalarheimilinu í Mjallhvít. Nú býður sveitarfélagið upp á líkamsrækt fyrir 60 ára og eldri í Sporthöllinni í fyrsta sinn og er mikil ánægja með tímana, stuðningur við félagsstarf aldraðra hefur verið aukið ásamt því að ýmis virkniúrræði eru nú í boði fyrir þjónustuþega á öllum aldri.

Framkvæmdir standa nú sem hæst í Hrollaugsstöðum þar sem 5 nýjar leiguíbúðir munu verða teknar í notkun í lok febrúar. Vatnajökulsþjóðgarður tók þátt í framkvæmdakostnaði með fyrirframgreiddri leigu á þremur íbúðum fyrir starfsfólk og eru nú tvær íbúðir auglýstar til leigu á almennum markaði. Með framkvæmdinni er húsið nú komið í betri nýtingu og á sama tíma er verið að svara ákalli um leiguíbúðir í dreifbýlinu. Á undanförnum árum hafa félagsheimilin fengið töluverða uppliftingu með endurbótum bæði í Holti og á Hrollaugsstöðum. Nú í janúar er svo áformað að bjóða út endurbætur í Hofgarði þar sem stendur til að opna á milli leiks- og grunnskóla og samhliða fara í endurbætur á salernum.   

Mikligarður hefur fengið viðhald á þaki ásamt því að unnið er að hönnun vegna fyrirhugaðra endurbóta innanhúss. Áformað er að sinna endurbótum á Miklagarði í smáum skrefum á næstu árum með það að markmiði að húsnæðið verði nýtt sem byggðasafn fyrir sveitarfélagið og einnig undir atvinnustarfsemi. 

Mikil hreyfing hefur verið á fasteignamarkaðnum á undanförnu og aðeins þrjár eignir til sölu í þéttbýlinu á Höfn. Lóðaframboð er nú af skornum skammti og aðeins þrjár lóðir lausar til úthlutunar í þéttbýlinu við Dalbraut. Unnið er að því að fjölga lóðum til að anna eftirspurn, slíkt er þó ansi tímafrekt en mikil áhersla er á að vinna það hratt og örugglega. Það er ljóst að það ríkir bjartsýni og áhugi á því að búa í Sveitarfélaginu Hornafirði en einnig er mikil eftirspurn eftir leiguíbúðum í dreifbýlinu. Er því unnið að deiliskipulagningu íbúabyggðar við Hrollaugsstaði og í Borgartúni, Öræfum og eru aðeins þrjár lausar lóðir. Atvinnuleysi mældist töluvert framan af árinu 2021 en í sumar og haust dró mjög úr atvinnuleysi og kvarta atvinnurekendur nú yfir því að erfiðlega gangi að fá fólk til vinnu.

Starfsemi sveitarfélagsins

Árið hefur verið ansi krefjandi á starfsstöðvum stofnana sveitarfélagsins. Mikið hefur mætt á leik- og grunnskólum í tengslum við faraldurinn. Hér höfum við sloppið ótrúlega vel hvað varðar útbreiðslu veirunnar, í það minnsta fram til þessa og vonandi verður svo áfram. Þegar upp hafa komið smit í samfélaginu hefur gengið vel að halda smitunum einangruðum þannig að þau hafa ekki laumað sér inn í skólastarfið. Í grunnskólanum var skipt um stjórnanda þegar Þórgunnur Torfadóttir tók við starfi sviðsstjóra fræðslu- og frístundasviðs en í stað hennar fengum við brottfluttan Hornfirðing, Þórdísi Sævarsdóttur til að taka við keflinu. Skólastarfið hefur gengið ótrúlega vel  og fengum við íbúar að njóta þess að horfa á árshátíð skólans í íþróttasalnum aftur eftir árs pásu, ótrúlega vel heppnuð Lion King sýning. Skipt var um skólastjórnanda í Grunnskólanum í Hofgarði þegar Brynja Kristjánsdóttir lét af störfum og tók Hafdís Roysdóttir við af henni en hún hefur lengi starfað við skólann.

Leikskólastarf hefur sömuleiðis gengið afar vel þrátt fyrir faraldurinn. Vel hefur gengið að manna leikskólann undanfarin ár en þar starfa 46 manns. Erfiðlega hefur gengið að fá leikskólakennara til starfa en sveitarfélagið hefur stutt vel við þá sem vilja stunda nám í leikskólafræðum sem hefur skilað nokkrum útskrifuðum leikskólakennurum í skólann. Í haust var tekin í notkun ný leikskóladeild fyrir ungabörn í Selinu við Víkurbraut 24 til að anna brýnni eftirspurn. Fræðslu- og tómstundanefnd er nú með það til skoðunar hvernig húsnæðismálum leikskólans verður háttað á næstu árum þar sem leikskólinn Sjónarhóll er nú fullsetinn og með lengingu fæðingarorlofs til 12 mánaða verður aukin krafa á að börn geti hafið leikskólavist strax að því loknu. 

Samfélagsumræða

Samfélagið okkar samanstendur af íbúum sem búa í því. Það hvernig samfélag við viljum byggja upp er algjörlega undir okkur sjálfum komið. Nú þegar nokkrir mánuðir eru eftir af þessu kjörtímabili finnst mér ástæða til að horfa í baksýnispegilinn. Það sem stendur upp úr í starfi mínu eru frábærir samstarfsfélagar bæði starfsmenn sveitarfélagsins og kjörnir fulltrúar. Samstarfið í bæjarstjórn hefur verið mjög gott allt kjörtímabilið og í þyngstu málunum hefur ríkt einhugur um ákvarðanir. Það er ekki sjálfgefið að svo sé og met ég það mikils. Starfsmenn sveitarfélagsins eru 200 talsins en það eru þeir sem halda sveitarfélaginu gangandi, halda uppi skólastarfi og velferðarþjónustu, halda götum og veitukerfum gangandi og þjónusta höfnina okkar svo eitthvað sé nefnt. Þessar grunnstoðir eru grundvöllur þess að sveitarfélagið geti vaxið og dafnað með öflugu atvinnulífi. Starfsmenn sveitarfélagsins eiga mikla þökk skilið fyrir þeirra óeigingjarna starf og ekki síst á tímum þegar áskoranir eru krefjandi vegna utanaðkomandi aðstæðna. Ég vil nota tækifærið og þakka öllu mínu samstarfsfólki fyrir frábært samstarf undanfarin ár. Einnig vil ég þakka íbúum fyrir gott samstarf og þakka þá hvatningu og stuðning sem ég hef fengið. Síðasta árið hefur verið mjög krefjandi fyrir mig persónulega en ég kýs að líta á það sem áskorun sem ég tekst á af yfirvegun og jákvæðni. Sveitarfélagið Hornafjörður er vaxandi samfélag sem hefur alla burði til að vaxa enn frekar, samþykkt hefur verið stefna til næstu ára fyrir sveitarfélagið þar sem grunngildin virðing, framsækni og samvinna eru höfð að leiðarljósi. Það er við hæfi að enda áramótapistil minn á þessum orðum um leið og ég þakka fyrir samstarfið á árinu.

Matthildur Ásmundardóttir, bæjarstjóri

Hjúkrunarheimili – nýbygging við Skjólgarð

Skráð af
ritstjorn
-

Þriðju mótmælin vegna tafa við byggingu nýs hjúkrunarheimilis á Höfn fóru fram á Skjólgarði í gær föstudag. Að frumkvæði íbúa Skjólgarðs hófust reglubundin föstudag mótmæli fyrir tveimur vikum síðan. Fyrstu mótmælin voru haldin af íbúum sjálfum, næst voru það starfsmenn og nú aðstandendur íbúa heimilisins. Bæjarstjóri tók þátt í mótmælunum að þessu sinni og þakkaði við það tilefni íbúum og aðstandendum fyrir hvatninguna. 

Ferlið fram að þessu

Tafir á framkvæmdum eru til komnar vegna ýmissa þátta, hönnunin tók lengri tíma en áætlað var, sömuleiðis lokavinna við útboðsgögn og kostnaðaráætlun. Framkvæmdir voru boðnar út síðastliðið vor og bárust tvö tilboð sem voru bæði vel yfir kostnaðaráætlun. Báðum tilboðum var hafnað en samkvæmt lögum um opinber innkaup er heimilt að leita samninga við bjóðendur. Undanfarinn mánuð hafa samningaviðræður staðið yfir og er nú komin niðurstaða. Sveitarfélagið og heilbrigðisráðuneytið fengu sent minnisblað þar um frá Framkvæmdasýslu ríksins í lok vikunnar. Þar kemur fram að tekist hefur að lækka kostnað við bygginguna töluvert sem kemur þó ekki niður á gæðum hennar. Minnisblaðið fær umfjöllun í bæjarráði á þriðjudag einnig þarf niðurstaðan að fá umfjöllun hjá samstarfsnefnd um opinberar framkvæmdir og fá þar samþykki fyrir nýrri kostnaðaráætlun. 

Bæjarfulltrúar Framsóknarflokksins hafa verið í samskiptum við heilbrigðisráðherra og þingmenn Suðurkjördæmis um málið. Ráðherra og þingmenn eru bjartsýnir á að ný kostnaðaráætlun fáist samþykkt af ríkinu. Það er því von okkar allra að framkvæmdir við nýtt hjúkrunarheimili geti hafist á næsta ári. Þangað til höldum við, allt samfélagið áfram að mótmæla þar til rödd okkar heyrist.

Matthildur Ásmundardóttir, bæjarstjóri.

Skipulagsmál

Skráð af
ritstjorn
-
Ásgrímur Ingólfsson

Skipulagsmál hafa verið fyrirferðamikil á því kjörtímabili sem rennur sitt skeið á enda nú á vormánuðum og hafa þau tekið talsverðan tíma. Bæði þau sem sveitarfélagið hefur gert og þau sem einstaklingar hafa látið gera fyrir sig. Öll verða þau að koma fyrir umhverfis- og skipulagsnefnd  til staðfestingar og auðvitað verða íbúar að hafa tök á að kynna sér þau á skipulagstímanum. Sum hafa tekið alltof langan tíma og er ekki við neinn einn að sakast, bæði hafa verið mannabreytingar á þeim verkfræðistofum sem hafa verið að vinna fyrir okkur. Menn hafa líka verið að kenna Covid um og svo síðast en ekki síst þá eru takmörk fyrir því hvað stjórnsýslan getur afkastað miklu svo vel sé, því ef við vöndum okkur ekki þá hefur þetta tilhneigingu til að fara í skrúfuna.

Þétting byggðar

Eins og lesendum ætti að vera kunnugt þá hefur það skipulag verið lengi í fæðingu og ferli til staðfestingar. Haldnir voru nokkrir fundir með íbúum og brugðist var við ýmsum ábendingum sem fram komu þó mörgum finnst ekki nóg að gert. Skipulagið er tilbúið og hægt verður að hefja úthlutun samkvæmt því um leið og íbúakosning hefur farið fram, svo framalega að íbúar samþykki skipulagið. Í þessu skipulagi eru sjö lóðir þar af ein raðhúsa lóð með þremur íbúðum. ´Ég tel að þetta sé gott skipulag, bæði hefur verið hugsað fyrir nýtingu innviða og lands án þess ganga of mikið á græn svæði og útivistarmöguleika íbúa.

Ég hvet íbúa til að taka þátt í kosningunni þegar þar að kemur og umfram allt að kynna sér málið með opnum hug, velta fyrir sér hvernig samfélag og byggðarmynstur menn sjá fyrir sér í ókomni framtíð.

Hrollaugsstaðir og Leiran

Á síðasta fundi umhverfis- og skipulagsnefndar fjölluðum við meðal annars um deiliskipulögin á Hrollaugsstöðum og Leirunni. Þau skipulög eru langt kominn og hef ég væntingar um að þau verði kláruð fljótlega eftir áramót. Í skipulaginu á Hrollaugsstöðum er gert ráð fyrir fimm íbúða raðhúsi og einu parhúsi í fyrsta áfanga síðan í framhaldinu væri hægt að bæta við tveimur parhúsum og einu raðhúsi. Á Leirunni er gert ráð fyrir blandaðri byggð, en auðvitað getur þetta breyst í skipulagsferlinu m.a. með athugasemdum frá íbúum. 

Miðbæjarsvæði

Þetta skipulag er styttra á veg komið,  því miður og lítið um það að segja. Hér erum við að reyna að hugsa til næstu áratuga og sjá fyrir okkur bygginga þarfir tengdar grunnskóla og íþróttum. Í vinnu við þetta skipulag er verið að reyna að hafa pólitíska samstöðu svo niðurstaðan geti verið leiðarvísir næstu bæjarstjórna inní framtíðina.

Hafnarsvæðið

Umhverfis- og skipulagsnefnd og hafnarstjórn eru nýbúnar að samþykkja skipulagslýsinguna fyrir hafnarsvæðið svo sú vinna er farin á fullt og verður vonandi langt komin á vormánuðum. Hér er aðallega verið að laga agnúa sem voru á fyrra skipulagi og skýra starfsemi hafnarinnar betur.

Heppan

Í sumar hófum við vinnu við að endurskoða skipulagið á Heppunni. Bæði er það tilkomið til að bregðast við bílastæða skorti á hafnarsvæðinu og svo hitt að atvinnu- og menningarmálanefnd hefur skilgreint hlutverk Miklagarðs og Verðanda (rústana) og er kominn með metnaðarfulla framtíðarsýn fyrir svæðið. Einnig hafa nýir eigendur að sláturhúsinu óskað efir því að koma inní þetta skipulag því fyrirhuguð starfsemi þeirra fellur vel að þeirri starfsemi sem fyrir er á svæðinu. Gaman verður að fylgjast með þeirri uppbyggingu á næstu misserum.

Leiðarhöfði

Leiðarhöfða svæðið er komið í samkeppni og það verður spennandi að sjá þær hugmyndir sem eiga eftir að koma fram hjá þeim hönnuðum sem taka þátt. Svæðið er dýrmætt og á eftir að verða með vinsælustu útsýnissvæðum á landinu í framtíðinni

Hér hef ég aðeins stiklað á stóru í skipulagsmálum og ekki talið upp þau fjölmörgu skipulög sem íbúarnir eru með á sinni könnu, þau hafa verið fjölmörg þessi síðustu ár. Flest hafa þau verið metnaðarfull og góð. 

Víkin milli  Leiðarhöfða og Afkastahóls (við Ránarslóð)

Eins og ykkur er kunnugt um hefur verið nafnasamkeppni um þessa vík. Þegar þetta er skrifað hef ég ekki hugmynd um hvað nöfn hafa komið fram. Ég hef verið að grafast fyrir um kennileiti á svæðinu eða nafn sem hægt væri að nota og er sú vinna enn í gangi. Þau nöfn sem mér hefur dottið í hug eru þessi:

  • Ytri Höfðavík, samkvæmt kortum er Höfðavík innan við Leiðarhöfðann.
  • Mönguvík, tenging við Möngu hellir sem er í Afkastahól.

Þessari leit er ekki lokið og vonandi finnum við gott nafn.

Ásgrímur Ingólfsson, forseti bæjarstjórnar og formaður umhverfis- og skipulagsnefndar.

 [ÞT1]

1...789...17Síða 8 af 17
© Framsóknarfélag Austur-Skaftafellssýslu